9 июнь куни Италия пойтахти Римда старт олган таэквондо WТ бўйича Гран-при мусобақасининг илк кунида ўзбекистонлик спортчилар 2 та медални қўлга киритди, деб хабар бермоқда Миллий олимпия қўмитаси ахборот хизмати.

-68 кг вазн тоифасида ярим финалда хорватиялик Марко Голубочни енгиб финалга йўл олган Улуғбек Рашитов ҳал қилувчи баҳсда венгриялик Левенте Жозсани 2:0 ҳисобида мағлуб этди ва чемпионга айланди. Шу тариқа 8 йиллик танаффусдан сўнг ўзбекистонлик таэквондочилар Гран-при мусобақасида яна олтин медалга сазовор бўлди.

+80 кг тоифасида кураш олиб борган Никита Рафалович ярим финалда хорватиялик Иван Сапинани енгганди. Аммо финал жангида у Буюк Британия вакили Каден Куннингҳемга имкониятни бой бериб, шоҳсупанинг иккинчи поғонасидан жой олди.

10 июнда ҳам 2 нафар ўзбекистонлик спортчи медаллар учун кураш олиб боради. Сўнгги 2 та жаҳон чемпионатининг қаҳрамонларидан Феруза Содиқова ҳамда Светлана Осипова мусобақани қуйидаги рақибларга қарши бошлайди:

-67 кг: Феруза Содиқова — Йоланта Тарвида (Латвия).

+67 кг: Светлана Осипова — Белен Моран (Испания).