2023 йилда дунёда экологик тоза технологияларга киритиладиган инвестициялар 1,7 трлн долларгача ошади. Халқаро энергетика агентлиги (ХЭА) прогнозида бу ҳақда сўз боради. Гап қайта тикланадиган энергия манбалари, электромобиллар, атом энергияси, кам эмиссияли ёқилғилар ва бошқа «яшил» технологиялар ҳақида бормоқда.
Анъанавий энергетикага — кўмир, газ ва нефтга инвестициялар 1 трлн доллардан сал кўпроқни ташкил қилади. ХЭА прогнозига кўра, энергетика соҳасига инвестицияларнинг умумий ҳажми жорий йилда 2,8 трлн долларни ташкил этади.
«Қазиб олинувчи ёқилғиларга сармоя қилинган ҳар бир долларга ҳозирда тоза энергияга 1,7 доллар тўғри келмоқда. Беш йил олдин бу кўрсаткич бирга бир нисбатда эди. Эътиборга молик мисоллардан бири қуёш энергетикасига сармоя киритиш бўлиб, у илк бор нефть қазиб олишга киритилаётган инвестициялардан ошади», деди ХЭА ижрочи директори Фатих Бирол.
Агентлик 2023 йилда қуёш энергияси ишлаб чиқаришга 380 млрд доллар сармоя киритилишини кутмоқда.
ХЭАнинг қайд этишича, сўнгги йилларда яшил энергияга сармоя киритишни бир қатор омиллар, хусусан, АҚШ, Европа, Япония, Хитой ва бошқа мамлакатларда секторни сиёсий қўллаб-қувватлашнинг кучайиши, шунингдек, айниқса Россиянинг Украинага бостириб кириши фонида қазиб олинадиган ёқилғи нархларининг ўзгарувчанлиги рағбатлантирмоқда.
2021 йилдан бери тоза энергияга инвестициялар ўсишининг 90 фоиздан ортиғи ривожланган иқтисодиётлар ва Хитойга тўғри келди. Агентлик маълумотларига кўра, кўплаб ривожланаётган мамлакатларда қайта тикланадиган энергияга инвестициялар юқори фоиз ставкалари, ноаниқ сиёсат асослари, заиф тармоқ инфратузилма, коммунал хизматлардаги молиявий қийинчиликлар ва капиталнинг юқори нархи билан чекланмоқда.
