Украина донини Қора денгиз портларидан экспорт қилиш бўйича 18 майда муддати тугаган келишув икки ойга узайтирилди, дея хабар бермоқда Euronews.
«Туркиянинг саъй-ҳаракатлари, шунингдек, россиялик ва украиналик дўстларнинг кўмаги билан Қора денгиз донига оид келишув яна икки ойга узайтирилди», — деди Туркия президенти Режеп Таййип Эрдоған.
Битимнинг узайтирилиши Украина ва Россия ҳукумати томонидан ҳам тасдиқланди. БМТ раҳбари Антониу Гуттериш бу қарорни олқишлади ва уни «дунё учун яхши янгилик» деб атади. Унинг қўшимча қилишича, ҳал қилинмаган муаммолар ҳамон сақланиб қолмоқда, аммо Россия, Украина, Туркия ва БМТ уларни муҳокама қилишда давом этади.
BBC`нинг русча нашри хабарига кўра, Россияда шартномани яна бир бор узайтириш учун бир қатор шартлар бор эди. Бу, хусусан, унинг қишлоқ хўжалиги маҳсулотларини экспорт қилиш билан боғлиқ. Томонлар талабларни бажаришга рози бўлганми ёки йўқми, ҳозирча номаълум.
Украина дунёдаги етакчи дон маҳсулотлари ишлаб чиқарувчисидир. 2022 йил февраль ойида Россия босқинидан кўп ўтмай, мамлакатнинг Қора денгиз портларидаги омборлари Россия флоти томонидан тўсиб қўйилди.
Ўтган йилнинг июль ойида Украина, Россия БМТ ва Туркия билан бир томонлама шартномалар тузди, бу эса дон ва бошқа озиқ-овқат маҳсулотларини жаҳон бозорига етказиб беришни давом эттиришга имкон берди. Битимнинг бажарилишини назорат қилиш учун Истанбулда Қўшма мувофиқлаштириш маркази ташкил этилди. Битим бир неча бор узайтирилди.
БМТ маълумотларига кўра, келишув давомида Украина портларидан 30 млн тоннага яқин дон олиб чиқилган.
