Ижтимоий тармоқларда Тошкент вилояти Олмалиқ шаҳрида 9 қаватли бино қурилиши сифати танқид қилинган видео тарқалди.
Видео муаллифи таянч устунлар арматурасининг ингичкалиги (10 мм) ва улар ораси жуда катта (70 см баландликда) эканлигини таъкидлайди. Эркак бетоннинг сифатсизлиги, юзаси парчаланиб кетганлигига ҳам эътибор қаратади.
Унинг сўзларига кўра, қурувчининг вакили кадастр ҳужжатлари икки кун ичида тайёр бўлишини айтган.
Ўзбекистон Қурилиш ва уй-жой коммунал хўжалиги вазирлиги мазкур видео юзасидан муносабат билдирар экан, Қурилиш ва уй-жой коммунал хўжалиги соҳасида назорат инспекцияси ходимлари томонидан ҳолат ўрганилаётганини маълум қилди.
«Объектда қурилиш-монтаж ишлари тўхтатилган ҳамда тегишли органларга тақдим этиш учун зарур ҳужжатлар тўпланмоқда», — дейилади хабарда.
Аввалроқ, 2022 йилда Қурилиш назорати инспекциясига қурилиши якунланган биноларни фойдаланишга топширишга рухсат бериш бўйича 16 576 та мурожаат келиб тушгани хабар қилинганди. Бироқ 11162 та объект бўйича қурилиш меъёрларига риоя этилмаганлиги сабабли аризалар рад этилган.
