«Ёшлар» телеканали орқали 28 март куни эфирга узатилган «Биз томонларда» кўрсатувида Қорақалпоғистон Республикаси номи «Қорақалпоқ вилояти» тарзида намойиш этилди. Кейинроқ телеканал бу хатолик монтаж жараёни билан боғлиқ эканини билдириб, узр сўради.
«Бугун телеканалимиз фаолиятида жуда кам-кам учрайдиган қўпол хатоликка йўл қўйилди. Соат 12:05 да Қорақалпоғистон Республикасидан тайёрланган «Биз томонларда» кўрсатуви намойиш этилган эди. Кўрсатувда монтаж жараёнидаги техник хатолик сабабли «Қорақалпоғистон Республикаси»нинг номи хато кўрсатилган. Ушбу қўпол хатоликка йўл қўйилгани учун биз, «Ёшлар» телеканали жамоаси, кўп сонли телетомошабинларимиздан узр сўраймиз», — дейилади унда.
Телеканал «айбдорларга нисбатан тегишли чоралар кўрилаётганини» ҳам қўшимча қилди.
Мазкур кўрсатув «Қорақалпоғистон Республикаси»нинг номи тўғриланган ҳолда шу куннинг ўзида қайта намойиш этилди.
Эслатиб ўтамиз, 2022 йилнинг август ойида «Ёшлар» телеканалининг «Янги давр» кўрсатувида Real Madrid жамоаси номи ёнидаги Украина байроғи хиралаштириб кўрсатилганди. Буни монтажчи хато қўйилган деб ўйлаган ва ўзбошимчалик билан беркитган, дея тушунтирган телеканал раҳбарияти. Монтажчи ва масъул муҳаррир жазолангани айтилган.
