World Happiness Report 2023 бахтли мамлакатлар рейтингининг янги нашри эълон қилинди. Ўзбекистон ушбу рейтингда 1 поғона пастлаб, 54 ўринни эгаллади.
Ҳужжатни ишлаб чиқишда экспертлар асосан аҳоли даромадлари, соғлиқ, ижтимоий қўллаб-қувватлаш, бандлик ва коррупция даражаси каби кўрсаткичларни ҳисобга олган. Бундан ташқари, рейтингда мамлакатда фуқаролик эркинликлари, хавфсизлик ва келажакка ишонч ҳисси мавжудлиги, шунингдек, оилаларнинг барқарорлиги кўрсаткичлари ҳам инобатга олинади.
Қайд этилишича, 2023 йилда Финляндия кўрсаткичлар бўйича бошқа давлатларга қараганда анча илгарилаб кетган. Скандинавия мамлакатидан ташқари бешликда Дания, Исландия, Исроил ва Нидерландия қайд этилган.
Кучли ўнликка Швеция, Норвегия, Швейцария, Люксембург ва Янги Зеландия ҳам кирган. Россия 70-ўринни, Украина эса 92-ўринни эгаллаган.
Шу билан бирга, Афғонистон (137-ўрин) ва Ливан (136-ўрин) дунёдаги энг бахтсиз давлатлар сифатида тан олинган.
Маълумот учун, Финляндия олтинчи йилдирки World Happiness Report рейтингида етакчилик қилмоқда. Кучли учликнинг қолган ўринлари ҳам ўзгаришсиз қолган (Дания, Исландия).
2023 йилги рейтингни тузишда бахтлилик даражаси 2020−2022 йиллардаги ўртача 3 йиллик кўрсаткичдан фойдаланган ҳолда аниқланган.
Эслатиб ўтамиз, Ўзбекистон бахтли мамлакатлар рейтингининг 2017−2021 йиллардаги ҳисоботида МДҲ ва Марказий Осиё давлатлари орасида етакчи бўлиб келаётган эди. 2021 йилда Ўзбекистон 42 ўринни эгаллаган бўлса, 2022 йилги рейтингда Қозоғистон Ўзбекистондан 13 поғона юқорилаб (мос равишда 40 ва 53), МДҲ ва Марказий Осиё давлатлари орасида ушбу рейтингда биринчи ўринни эгаллаган.
Беш йил давомида Ўзбекистоннинг рейтингдаги позицияси 40 ўрин атрофида шаклланиб турган.
World Happiness Report (Бахтиёрлик тўғрисидаги ҳисобот) БМТнинг барқарор ривожланиш ечимларини излаш бўлими томонидан ҳар йили тузиб келинади. Ушбу ҳисобот ва рейтинг 2012 йилдан бери эълон қилиб келинади.
