Хитойлик амалиётчи олимлар Камбағалликни қисқартириш ва бандлик вазирлигида маслаҳатчи сифатида фаолият юритади. Бу ҳақда вазирлик ахборот хизмати хабар бермоқда.
Таъкидланишича, Ўзбекистоннинг Хитойдаги элчихонаси кўмагида хитойлик олимлар — Чжан Ци ва Ван Сяо Линнинг мамлакатга ташрифи ташкил этилди.
«Хитой камбағаллик устидан тўлиқ ғалаба қозонганини эълон қилган биринчи мамлакат саналади. Икки давлат ўртасида жадал ривожланаётган стратегик шериклик Хитойнинг бу борадаги илғор тажрибасини ўрганиш учун кенг имкониятлар беради. Камбағалликга қарши курашда Хитой тажрибасини ўрганиш ва жорий этиш бўйича ҳамкорликда тадбирлар ўтказиш юзасидан икки давлат раҳбарлари ўртасида келишувга эришилгани бунинг ёрқин далилидир», — дейилади вазирлик ахборотида.
Қайд этилишича, хитойлик олимлар ва вазирлик раҳбарияти билан бўлиб ўтган учрашувда ҳамкорликдаги ишларнинг устувор йўналишлари муҳокама қилинган.
Фото: Камбағалликни қисқартириш ва бандлик вазирлиги ахборот хизмати
«Ўзбекистон ҳукумати камбағалликни камайтиришга қанчалик катта эътибор қаратаётганини қисқа вақт ичида ҳис қилдик ва биз белгиланган мақсадларга эришишда ёрдам беришга тайёрмиз», — дейди Пекин педагогика университетининг Иқтисодиёт ва ресурсларни бошқариш институти профессори Чжан Ци.
Маълум қилинишича, мутахассислар дастлаб ҳудудларга сафар қилиб, соҳадаги ишларнинг бугунги ҳолатини ўрганади. Таҳлил натижаларига кўра, камбағалликни аниқлашнинг молиявий ва номолиявий мезонларини ишлаб чиқиш режалаштирилган.
«Кейинчалик, илмий ёндашув асосида камбағалликдан чиқиш бўйича мақсадли дастурлар ишлаб чиқилиб, улар вилоятлар, туманлар ва маҳаллалар миқёсида амалга оширилади. Шунингдек, ушбу дастурларнинг самарадорлигини мониторинг қилиш механизмини жорий этиш назарда тутилган. Ўқув дастурларини қайта кўриб чиқиш орқали касб-ҳунар таълими тизимини ўзгартиришга алоҳида эътибор қаратилади», — дейилади ахборотда.
Таъкидланишича, ушбу чоралар кадрлар тайёрлаш борасида ички ва ташқи меҳнат бозорида талабга эга бўлган замонавий билим ва кўникмаларни шакллантириш имконини беради.
Эслатиб ўтамиз, Ўзбекистон президенти Шавкат Мирзиёев 2021 йилнинг 27 октябрь куни Хитой Халқ Республикаси раиси Си Цзиньпин билан телефон орқали мулоқот қилганди. Унда камбағалликни камайтириш масалаларида тажриба ва билим алмашиш муҳим йўналиш сифатида белгилаб олинган эди.
2022 йилнинг 5 февраль куни Ўзбекистон президенти ва ХХР раисининг Пекиндаги учрашувида камбағалликка ва коррупцияга қарши курашиш борасида Хитой тажрибасини ўрганиш ва жорий қилиш бўйича қўшма чора-тадбирларни амалга оширишга келишиб олинганди.
