Тошкент халқаро аэропортининг учиб келиш терминали олдида кутиб олувчилар учун ҳудуд қурилиши бошланди, дея хабар бермоқда Uzbekistan Airports матбуот хизмати.
Режалаштирилган иккита кутиш жойидан биринчиси мавжуд шийпон ўрнига қурилади. Қурилиш ишлари март ойи охиригача якунланиши режалаштирилган.
Шу муносабат билан терминал олдидаги тўсиқдан яшил ҳудудгача бўлган ҳудуд баннер билан ўраб қўйилган. Йўловчиларнинг шаҳарга чиқиши вақтинча P2 автотураргоҳи орқали (кетиш ва келиш терминаллари ўртасида) амалга оширилади.
Аввалроқ Uzbekistan Airports Тошкент аэропортида электрон чегара назорати тизими ва қўл юкларини текшириш учун янги рентген ускуналарини намойиш этганди. Эндиликда йўловчилар пойабзалини ечмасдан ва суюқлик идишларини очмасдан текширувдан ўтади. Ҳудудда яна бир Duty Free дўкони, кафе ва дорихона ҳам очилганди.
Компания раиси Раъно Жўраеванинг айтишича, март ойи охирига қадар кичик меҳмонхона, ҳаммом, таҳорат олиш ва намоз ўқиш хоналари ҳам ишга туширилади.
