Ўзбекистон президенти Шавкат Мирзиёев номига Америка Қўшма Штатлари президенти Жо Байдендан мактуб келди, дея хабар қилди давлат раҳбари матбуот котиби Шерзод Асадов.

«Мамлакатларимиз ўртасидаги муносабатларни мустаҳкамлашда кўрсатаётган етакчилигингиз ва шахсий интилишингиз учун, шу жумладан хавфсизлик соҳасидаги ҳамкорлик учун чуқур миннатдорлик билдираман», — дейилади мактубда.

АҚШ президентининг қайд этишича, Ўзбекистон билан иқтисодиёт ва энергетика масалаларида ўзаро алоқаларни ривожлантириш, шунингдек, Шавкат Мирзиёевнинг мамлакатни сиёсий тизимини модернизация ва ислоҳ қилиш борасидаги саъй-ҳаракатларингизни қўллаб-қувватлаш АҚШ учун устувор аҳамиятга эга.

АҚШ ва Ўзбекистон ўртасидаги стратегик шериклик чуқурлашиб бораётганини таъкидлаган Жо Байден эришилган ютуқларни 2023 йилда ҳам янада илгари суришига умид билдирди.

«Сиз Марказий Осиёдаги бешта мамлакатнинг минтақавий ҳамкорлигини кенгайтириш орқали қўшни мамлакатлар билан муносабатларни ривожлантиришга катта эътибор қаратаётганингизни алоҳида қайд этмоқчиман. Бу саъй-ҳаракатлар Марказий Осиёда ва унинг ташқарисида равнақ ва барқарорликни таъминлашга катта ҳисса қўшмоқда», — деди АҚШ президенти.

Жо Байден АҚШ ва Ўзбекистон ўртасидаги шериклик, мана 30 йилдирки, БМТнинг барча мамлакатларнинг мустақиллиги, суверенитети ва ҳудудий яхлитлигини ҳурмат қилишдек асосий принципларига риоя қилиш асосида ривожланди.

«Ишончим комилки, ушбу қадриятларга муштарак содиқлигимиз ўзаро алоқаларимиз узоқ муддатли истиқболда янада мустаҳкамланишига хизмат қилади», — дейилади мактабда.