Ҳиндистон (аёллар ўртасида) ва Ўзбекистонда (эркаклар ўртасида) бўлиб ўтадиган бокс бўйича жаҳон чемпионатини бир неча давлатлар бойкот қилди.
8 февраль куни АҚШ бокс федерацияси ташкилотнинг расмий сайтида Америка жамоасининг эркаклар ва аёллар ўртасидаги жаҳон чемпионатларида қатнашишдан бош тортгани ҳақида баёнот билан чиқди. Баёнотда бу позиция учун бир қатор далиллар келтирилган, бироқ асосий сабаб Халқаро бокс ассоциациясининг Россия ва Беларусь боксчиларига ўз миллий байроқлари остида мусобақаларда қатнашишига рухсат бериш ҳақидаги қарори бўлди.
USA Boxing раҳбари Майк МакАти Марокашда бўлиб ўтган сўнгги бокс турнирида россияликлар ўз байроғи ва мадҳияси остида чиқиш қилганига эътибор қаратди.
Шунингдек, у ХБАга қарши бошқа даъволарни ҳам санаб ўтди, унинг фикрича, жаҳон чемпионатларида иштирок этиш «нафақат Халқаро олимпия қўмитасининг 2 февралда тасдиқланган санкцияларини, балки ўйин ва шаффофлик тамойилларини ҳам бузади».
Даъволар рўйхати судьяларни танлашнинг бузилиши, санкциялар остида бўлган «Газпром»га ҳомийлик қилиш, «шаффоф бўлмаган» бюджетлар, гендер жиҳатдан аёллар ва эркакларга тенг пул мукофотларининг йўқлиги, шунингдек, Россия ва Беларусь спортчиларининг давлат байроқлари, мадҳиялари ва ранглари остида чиқишларига ХБА бераётган рухсатномани ўз ичига олади.
АҚШдан сўнг Ирландия бокс федерацияси ҳам у ерга россиялик спортчилар қабул қилингани сабабли эркаклар ва аёллар ўртасидаги жаҳон чемпионатларида қатнашишдан бош тортишга қарор қилди, Бу ҳақда Irish Independent (IABA) хабар берди. IABA Директорлар кенгаши турнирларни бойкот қилиш учун овоз берди, 15 киши буни ёқлади, 5 киши қарши чиқди.
Чехия бокс ассоциацияси президенти Марек Симак Чехия терма жамоасининг бокс бўйича жаҳон чемпионатини бойкот қилиш ниятини тасдиқлади. Sport.cz нашрига берган интервьюсида у бу қадамни Украинани қўллаб-қувватлаш ва Халқаро бокс ассоциацияси Россия президенти Владимир Путин билан алоқадор бўлган россиялик Умар Кремлев назорати остида қолаётганига жавоб деб атади.
Ҳа, катта мукофот пули бўлади. Иккита бронза медали учун 25 000 доллар, кумуш учун 50 000 доллар ва олтин учун 100 000 доллар. Кремль жаҳон чемпионатини бизнесга айлантирмоқчи. Бу ёмон эмас, лекин у ХОҚга қарши чиқиш билан муаммони ҳал қила олмайди… Бокс Олимпия ўйинларига тегишли, деди у.
Швеция бокс ассоциацияси раҳбари Пер-Аксель Шёхольмнинг айтишича, агар Россия ва Беларусь спортчилари мусобақада иштирок этса, мамлакат бокс бўйича жаҳон чемпионатини бойкот қилишга қўшилади.
«Бу ерда на демократия, на ошкоралик мавжуд. Биз ХБА аризасини қабул қилмаймиз. Демократия ва иллюзия йўқ. Биз ўзгаришларни амалга ошириш учун бир неча йил ишладик, аммо муваффақиятга эриша олмадик. Кейин улар ўзлари Россия ва Беларусга миллий байроқлар остида беллашишга рухсат беришга қарор қилди», — дея унинг сўзларини келтиради Чемпионат SVT нашрига таяниб.
Канада бокс федерацияси аёллар ва эркаклар ўртасидаги жаҳон чемпионатларини бойкот қилишга россиялик ва беларуслик спортчиларнинг иштироки, шунингдек, ушбу спорт турининг жаҳон бошқарув органи фаолиятига норозилик сифатида қўшилди.
Спорт ташкилоти раҳбари Райан О’Ши ХБАда давом этаётган коррупция туфайли спортнинг келажаги ҳақида жиддий хавотирда эканини айтди.
Буюк Британия келаси ой Ҳиндистонда бўлиб ўтадиган аёллар ўртасидаги бокс бўйича жаҳон чемпионатида россиялик спортчиларнинг ўз миллий байроғи остида иштирок этишидан хавотирлар туфайли иштирок этмайди. Спорт ташкилоти эркаклар терма жамоасининг Тошкентда бўлиб ўтадиган жаҳон чемпионатида иштирок этиши ҳам кўриб чиқилаётганини маълум қилди.
Эслатиб ўтамиз, бокс бўйича аёллар ўртасидаги жаҳон чемпионати 15−31 март кунлари Ҳиндистонда, эркаклар ўртасидаги жаҳон чемпионати Тошкентда 1−14 май кунлари бўлиб ўтади.
Умар Кремлев 2020 йилнинг декабридан буён IBA (собиқ AIBA)ни бошқариб келмоқда. Бунгача у Россия бокс федерацияси бош котиби лавозимида ишлаган. У лавозимга тайинланган пайтда ХБАнинг қарзлари 20 млн долларни ташкил қилган. 2021 йилнинг май ойида Кремль барча қарзларнинг тўлиқ қайтарилишини эълон қилди. 2022 йилда у ХБА президенти этиб қайта сайланди.
2019 йил июнь ойида ХОҚ Ижроия кенгаши қарзлари туфайли ташкилотдаги ХБА аъзолигини тўхтатиб қўйишни, аммо боксни Токио-2020 Олимпиада ўйинлари дастурида сақлаб қолишни тавсия қилди. ХОҚ сессиясида ушбу тавсиянома тасдиқланди. Натижада 2021 йилда Токиода бўлиб ўтадиган ёзги Олимпиада ўйинларида бокс бўйича мусобақаларни ташкил этиш ХОҚ томонидан амалга оширилди.
2022 йил февралида Халқаро олимпия қўмитаси Украинадаги вазият туфайли россиялик ва беларуслик спортчиларни мусобақаларга қўймасликни тавсия қилган бўлса, 4 март куни ХБА россиялик спортчиларга ташкилот шафелигидаги халқаро турнирларда қатнашишни тақиқлаган эди. 5 октябрь куни ХБА россиялик ва беларуслик боксчиларнинг дисквалификациясини бекор қилди, спортчиларга халқаро майдонларда миллий байроқлар ва давлат мадҳиялари остида қатнашишларига рухсат берилди.
Ўтган июнь ойида ХОҚ 2024 йилда Парижда бўлиб ўтадиган Олимпиада ўйинларидаги бокс турнири яна ХБдан ҳоли тарзда ўтказилишини эълон қилди. Бундан ташқари, бокс 2028 йилги Олимпия ўйинларининг дастлабки дастурига киритилмаган. Декабрь ойида эса қўмита ХБА аъзолигини тўхтатиб туришни маъқуллаганди.
