Наманган Муҳандислик-қурилиш институтининг 3-босқичида ўқиган 21 ёшли талаба 10 февраль куни ўзига ўт қўйиб, кучли куйиш сабабли шифохонада вафот этди. Бош прокуратура матбуот котиби Ҳаёт Шамсутдинов «Газета.uz»га воқеа тафсилотларини маълум қилди.
Келтирилишича, фарғоналик талаба 5 та фандан оралиқ назоратни топшира олмагани сабабли қайта топширишга қолиб кетган. Гуруҳ раҳбари талабанинг отасига қўнғироқ қилиб, уни бу ҳақда огоҳлантирган. Ўз навбатида, ота ўғлига телефон орқали танбеҳ берган.
Талаба шундан сўнг руҳий тушкунликка тушгани, Янгиқўрғон туманидаги «Нурафшон» маҳалласининг дала-адирлик майдонига ўзи билан бирга бензин олиб бориб, устидан қуйиб, ўзини ёқиб, жонига суиқасд қилгани айтилди. Маълум қилинишича, унинг жароҳат олганини кўрган фуқаролар ёрдам кўрсатиб, шифохонага олиб келган.
Тиббий маълумотда алангадан танасининг 50% қисмида чуқур куйиш жароҳатлари мавжудлиги кўрсатилган.
Шифокорлар томонидан кўрсатилган тез-тиббий муолажаларга қарамасдан, у 13 февраль куни шифохонада вафот этган. Шу куни Янгиқўрғон тумани прокуратураси ҳолат юзасидан Жиноят кодексининг 103-моддаси 1-қисми (Ўзини ўзи ўлдиришга ундаш, агар шахс ўзини ўзи ўлдирган ёки ўзини ўзи ўлдиришга суиқасд қилган бўлса, 2−5 йилгача озодликни чеклаш ёхуд беш йилгача озодликдан маҳрум қилиш билан жазоланади) билан жиноят иши қўзғатди. Тергов ҳаракатлари олиб борилмоқда.
