Тошкент метрополитенининг Ўзбекистон йўналишидаги тўртта поездига биттадан вагон қўшилди. Бу ҳақда «Газета.uz»га метрополитен матбуот котиби Тўйчи Мирзаев маълум қилди. Бундай поезд ўртача 1300 йўловчи, тўрт вагонли поездлар эса 1000 тагача йўловчи ташиши мумкин.
«Ҳозир бешта вагонли тўртта поезд мавжуд. Улар тажриба сифатида машинистлар кўникиши учун йўлга қўйилган», — деди Тўйчи Мирзаев.
Унинг қўшимча қилишича, тез орада беш вагонли 12 та поезд қатнови йўлга қўйилади.
Бундан ташқари, йил охиригача яна 14 та янги «Москва» замонавий поездларини харид қилиш режалаштирилган.
Тўйчи Мирзаев, шунингдек, пойтахтдаги 31 та олий ўқув юртида янги ўқиш жадвалига ўтиши метродаги тирбандлик муаммосини ҳал қилишга ёрдам берганини айтди. Қарор йўловчилар сонини тартибга солиш учун қабул қилинган. Декабрь ойининг бошидаги қор ёғишидан кейин ва январнинг аномал совуқ кунларида метрога талаб ошди.
Янги жадвал бўйича 23 январь куни ўқиш бошланганидан сўнг мутахассислар бир ҳафта давомида йўловчилар оқимининг ўзгаришини кузатиб боришди. Натижалар шуни кўрсатдики, эрталабки тиғиз соатларда бекатларда юклама камайиб, ўқувчилар дарсга ўз вақтида боришга улгурмоқда, деди у.
Унинг сўзларига кўра, тиғиз вақтда энг гавжум бўлган Чилонзор йўналишидаги бекатларда фақатгина 30 фоиз йўловчи вагонларга чиқа олаётганди. Қолганлари кейинги поездни кутишга мажбур бўлган.
Ушбу линияда жойлашган Олмазор бекатидан захира поездлари ҳам йўлга қўйилди. Ушбу чоралар туфайли поездлар ҳозирда бекатлардаги ўртача 80−85 фоиз йўловчини олиб кетяпти.
Бундан ташқари, метрополитен поездлар интервалини қисқартирди. Эрталаб Чилонзор йўналишида поездлар ҳар 1,5−2 дақиқада, Ўзбекистон йўналишида поездлар 3−4 дақиқа, Юнусобод йўналишида 6−7 дақиқа интервалда ҳаракатланмоқда.
