Тошкент шаҳри ҳокимининг биринчи ўринбосари Ҳотамбек Шакиров, ҳоким ўринбосари Шароф Раҳманов EDF департаментининг Марказий Осиё бўйича директори Эммануэл Чевеннемент, EDF`нинг бизнес бўйича катта менежери Анна Шараева ва Ўзбекистондаги бош директори Пьер Пол Антенисенс билан учрашув ўтказди. Бу ҳақда пойтахт ҳокимлиги ахборот хизмати хабар берди.
Таъкидланишича, учрашувда муқобил энергия манбаларидан фойдаланиш, хусусан, пойтахтдаги қатор объектларга қуёш панелларини ўрнатишга қаратилган лойиҳа доирасидаги ишлар кўриб чиқилган.
Қайд этилишича, лойиҳа, нафақат Тошкент шаҳри, балки мамлакат учун истиқболли ҳисобланади ва унинг амалга оширилиши натижасида электр энергияси сарфи сезиларли даражада камаяди. Объектларга ўрнатилган қуёш панеллари уларнинг ўз истеъмолидан ташқари қўшимча бинолар ва аҳолига йўналтирилиши мумкин.
Фото: Тошкент шаҳри ҳокимлиги ахборот хизмати
«Франция томонининг маълум қилишича, бугунги кунда лойиҳанинг техник, иқтисодий ва ҳуқуқий ҳужжатлари такомилига етказилмоқда. Шу билан бирга, ушбу узоқ муддатли, кенг кўламли лойиҳани биргаликда амалга ошириш учун ҳамкорлик қилиши мумкин бўлган компаниялар кўриб чиқилмоқда», — дейилади ҳокимлик ахборотида.
Учрашув якунида томонлар амалий мулоқотлар давом этишини билдирган.
