Британияда сўнгги ўн йилликдаги энг катта иш ташлашлар юз бермоқда

Британия бўйлаб ярим миллионга яқин ишчилар иштирокида норозилик намойишлари ўтказилмоқда. Лондонда қарийб 500 минг аҳоли оммавий иш ташлашларда иштирок этди. Инфляциянинг ўсиши, нарх-навонинг кўтарилиши ҳамда ҳукуматнинг минимал иш ҳажмини жорий этиш ташаббуси бунга сабаб бўлмоқда, дея хабар бермоқда CNN телеканали.

Норозилик акцияси иштирокчилари меҳнат шароитларини яхшилаш ва маошларини оширишни талаб қилишмоқда. Ушбу намойишлар ортидан Британияда минглаб мактаблар ёпилди. Университетларда маърузалар бекор қилинди. Жамоат транспортлари, темир йўл тармоғининг аксарият қисми тўхтаб қолди ҳамда авиарейслар кечиктирилди. Митингда Англия, Уэльс ва Шотландиянинг мактаб, университет ўқитувчилари, давлат хизматчилари, автобус ва поезд ҳайдовчилари ҳамда аэропорт ходимлари иштирок этишмоқда. Иш ташлашлар Англия ва Уэльсдаги 23,4 мингга яқин мактабнинг тўлиқ ёки қисман ёпилишига, 150 га яқин университетлардаги таълим жараёнларига таъсир қилди.


Швецияда банкрот бўлган компаниялар сони рекорд даражага етди

UC кредит агентлиги маълумотларига кўра, Швецияда банкротлик тўғрисида ариза берган компаниялар сони ўтган йилгига нисбатан 47 фоизга ошиб, 622 тага етди. Уй-жой нархларининг сўнгги 30 йилдаги энг ёмон пасайиш кўрсаткичи қурилиш соҳасидаги дефолтларга сабабчи бўлмоқда.

f-16, андроген алопеция, британия, дайжест, жаҳон янгиликлари, каллик, туркия, швеция, эрон

Уй хўжаликлари харажатларининг ортиши оқибатида нархлар ўтган йилнинг биринчи чорагидаги юқори чўққисидан 16 фоизга тушиб кетди. Creditsafe провайдери январь ойида банкрот бўлган бешта йирик компаниядан учтаси қурилиш соҳасида фаолият юритишини маълум қилганди. Статистик маълумотларга кўра, қурилиш саноатининг бандликни таъминлашдаги ҳиссаси катта бўлиб, Швециядаги 5,1 млн мутахассиснинг 350 мингдан ортиғи айнан шу соҳада ишлайди.


Исроил ҳарбий-ҳаво кучлари Ғазо секторига зарба берди

Иккинчи февраль пайшанбага ўтар кечаси Ғазо секторига ҳаводан бир нечта зарбалар берилди. Бу ҳақида Reuters ахборот агентлиги хабар тарқатди.

Исроил ҳарбий-ҳаво кучларининг маълум қилишича, асосан Ҳамас гуруҳининг қурол ишлаб чиқарувчи заводлари нишонга олинган. Бундан бир неча соат аввал «темир гумбаз» Ғазодан отилган ракеталарни тутиб олгани ҳақида маълумотлар тарқатилган эди. Шу боис ҳам яҳудийлар ушбу ҳужумни «жавоб зарбаси» дея аташмоқда. Ҳамас ҳамда «Исломий жиҳод» ҳаракатлари 1 февраль кунидаги ракета ҳужумини ўз зиммасига олишмаган. Айни пайтда қурбонлар ёки ярадорлар ҳақида маълумотлар йўқ.


Эрон ҳарбий заводига ҳужум учун Исроилдан қасос олишга ваъда берди

Эрон Исроилни Исфаҳон шаҳри яқинидаги ҳарбий заводга дронлар орқали зарба беришда айбламоқда. ISNA ахборот агентлигининг бу ҳақдаги расмий ахборотида айтилишича, Исроилнинг олиб бораётган яширин урушига қарши Эрон муносиб жавоб қайтаришга ваъда берди.

f-16, андроген алопеция, британия, дайжест, жаҳон янгиликлари, каллик, туркия, швеция, эрон

Видеодан лавҳа.

Ушбу ҳужум Теҳрон ва Ғарб ўртасидаги ядровий келишмовчиликлар, Эронга нисбатан қўйилаётган узоқ масофага учувчи камикадзе дронларини Россияга етказиб бериш айблови, бир-неча ойдан бери давом этаётган аксилҳукумат намойишлари фонида содир бўлди. Эроннинг БМТдаги вакили Амир Саид Иравоний раҳбариятга йўллаган мактубида ҳужум учун Исроил жавоб бериши муқаррарлиги, айни пайтда ҳеч қандай зарар ёки қурбонлар аниқланмаганлиги ҳақида ёзган.


Туркия Швециянинг эмас, Финляндянинг NATOга киришини ёқлайди — Эрдоған

«Туркия Финляндиянинг NATOга аъзо бўлишига ижобий муносабатда, бироқ Швецияни бу борада қўллаб-қувватламайди», — деди Туркия президенти Режеп Таййип Эрдоған.

f-16, андроген алопеция, британия, дайжест, жаҳон янгиликлари, каллик, туркия, швеция, эрон

Туркия етакчиси парламентдаги нутқида Финляндия бўйича ҳукуматнинг ижобий позициясини баён этди. Швеция ва Финляндия Россиянинг Украинага ҳужуми ортидан Транс-Атлантик мудофаа пактига қўшилиш ҳақида мурожаат билан чиқишган эди. Бироқ кутилмаганда Туркиянинг қатъий эътирозларига дуч келишди. Анқара Хельсинки ва Стокгольмдан Европа иттифоқи томонидан террорчи ташкилот деб тан олинган Курдистон ишчилар партияси ва бошқа экстремистик гуруҳларга нисбатан кескинроқ чоралар кўрилишини хоҳлаяпти.

Айни пайтда NATOнинг 30 та аъзосидан фақат Туркия ва Венгрия шимолликларнинг аризаларини ратификация қилмаган. Эрдоғаннинг баёноти эса Финляндиянинг тез орада альянсга қўшилиши мумкинлигига ишора қиляпти.


Ғарб F-16 қирувчи самолётларини Украинага етказиб бериши мумкинми?

Politico нашри АҚШнинг юқори мартабали мулозимлари Украинанинг эскирган ҳаво кучларини янги қирувчи самолётлар билан модернизация қилиш кераклиги ҳақида ўйлашаётгани ҳақида ёзмоқда.

Жумладан, Украина катта эҳтимол билан Дания ёки Нидерландиядан F-16 қирувчи самолётларини олиши мумкин. Нидерландияда худди шу русумли самолётлардан 40 тача мавжуд. Дания эса айни пайтда жанговор самолётлари тўпламини F-35 қирувчи самолётларига алмаштирмоқчи. Бундан аввал, Польша ва Франция ҳам Украина учун ҳарбий самолётлар етказиб бериши мумкинлигини истисно қилмаганди.

Ўз навбатида, Politico нашри бу ҳақидаги таҳлилида АҚШ президенти Жо Байден Украинага сўралаётган қирувчи самолётларни жўнатадими ёки йўқми деган саволга, Германия ва Буюк Британия сиёсатчилари томонидан «йўқ» деб жавоб берилишига қарамай, ҳаммасини урушнинг бориши ҳал қилишини ёзмоқда. «Бу уруш бошланганидан бери кузатилаётган ҳолат: бир пайтлари хаёлда бўлмаган Германия қуролларидан тортиб замонавий танкларгача фронт майдонида пайдо бўлиши вақт ўтгани сайин амалга ошди», -дейилади хабарда.


АҚШ Адлия вазирлиги Жо Байденнинг уйида режали тинтув ўтказди

АҚШ Адлия вазирлиги чоршанба куни Делавер штати Рехобот-Бич шаҳридаги президент Жозеф Байденнинг шахсий уйида режали тинтув ўтказди, дея хабар қилди Синьхуа агентлиги.

«Бугун президентнинг тўлиқ розилиги ва ҳамкорлиги билан АҚШ Адлия вазирлиги унинг Делавер штати Рехобот-Бич шаҳридаги уйида мунтазам тинтув ўтказмоқда», — деди Байденнинг шахсий адвокати Боб Бауэр АҚШ матбуотига берган баёнотида.

«Адлия вазирлигининг стандарт тартиб-қоидаларига мувофиқ, хавфсизлик ва ишончлилик манфаатларини кўзлаб, бу ишларни жамоатчиликка олдиндан огоҳлантирмасдан амалга ошириш керак эди ва биз ҳамкорлик қилишга келишиб олдик», — деб ёзади Боб Бауэр.

Адлия вазирлиги, шунингдек, 2022 йил ноябрида Вашингтондаги Пенн Байден марказида махфий ҳужжатлар топилганидан сўнг, 20 январь куни Байденнинг Делавер штатининг Уилмингтон шаҳридаги уйида ҳам рейд ўтказган.


Тадқиқот: Ширин газли ичимликларни истеъмол қилиш эркакларда каллик пайдо бўлишига олиб келади

Хитойнинг Цингхуа университети тадқиқотчилари гуруҳи ёш эркакларда кўп миқдорда шакарли ичимликлар ичиш ва соч тўкилиши ўртасида боғлиқлик борлигини аниқлади, дея хабар бермоқда Синьхуа.

f-16, андроген алопеция, британия, дайжест, жаҳон янгиликлари, каллик, туркия, швеция, эрон

Фото: Синьхуа

Олимлар ўртача ёши 27,8 бўлган 1028 нафар хитойлик эркак ўртасида ўтказилган сўров натижаларини ўрганиб, шундай хулосага келди. Уларнинг тахминан 57,6 фоизи андроген алопециядан азият чекишган.

Андроген алопеция эркакларда соч тўкилишининг энг кенг тарқалган шакли бўлиб, эркакларда соч тўкилишининг барча шаклларидан тахминан 95 фоизини ташкил қилади.

Тадқиқот доирасида ўрганилган шакарли ичимликлар таркибига мева шарбатлари, алкоголсиз ичимликлар, спорт ва энергетик ичимликлари, ширин ва ёнғоқ сутлари, ширин чой, қаҳва ва бошқалар киради.

44,6 фоиз сўров иштирокчилари ҳафтасига етти мартадан кўпроқ ширин ичимликлар ичишларини айтишди. Олимларнинг аниқлашича, кўпроқ шакарга бой ичимликлар истеъмол қиладиган одамларда бошнинг тепа қисмидаги сочлар тезроқ сийраклашади. Андроген алопециядан азият чекувчи эркаклар ҳафтасига ўртача 4,293 миллилитр ширик ичимликлар истеъмол қилган, соғлом эркаклар гуруҳида эса бу кўрсаткич 2,513 миллилитрдан юқорироқ бўлган.