Бразилия президенти Луис Инасиу Лула да Силва 8 январь, якшанба куни бошланган тартибсизликлар сабабли мамлакат пойтахти Бразилиада январь ойи охиригача фавқулодда ҳолат эълон қилди, дея хабар бермоқда мамлакатнинг Globo телеканали.
Собиқ президент Жаир Болсонаронинг минглаб тарафдорлари октябрь ойидаги президентлик сайловлари натижаларига қарши чиқди. Сариқ-яшил кийимдаги Бразилия байроқлари билан шаҳар марказига кириб келган намойишчилар Миллий Конгресс (Парламент), Федерал Олий суд бинолари ва давлат раҳбарининг ишчи қароргоҳи бўлган Планалто саройига бостириб кириб, унинг ойналарини синдирди.
Ишламайдиган кунларда бўш турган маъмурий бинолар қўриқчилари қоидабузарларга қарши тура олмади. Кейинроқ полиция кўздан ёш оқизувчи газ ишлатиб, уларни ортга қайтариб юборди. Турли маълумотларга кўра, воқеада 3000 га яқин одам иштирок этган, 300 дан 400 гача одам ҳибсга олинган.
Фото: EPA
Давлат раҳбари иштирокчилар қонун доирасида тўлиқ жазоланишини айтди. Лула да Силва уларнинг ҳаракатларини «варварлик» деб атади. «Бу одамларни намуна бўлиши учун жазолаш керак, шунда ҳеч ким ҳеч қачон орқасида давлат байроғи ёки Бразилия терма жамоаси либосида бугунги кунда қилган ишни қилишга журъат эта олмайди», — деди у.
Президент якшанба куни Сан-Паулуда эди. Тартибсизликлар муносабати билан у Бразилиага учиб кетди. Олий суд судьяси Александр де Мораэс Бразилиа губернатори Ибаньес Рошани 90 кунга лавозимидан четлаштириш тўғрисида қарор чиқарди, дея хабар бермоқда SNN Brazil. Роша ўз блогида президент ва конгрессменлардан узр сўради.
Vídeo oficial na íntegra. pic.twitter.com/lv6NTXkS0k
— Ibaneis Rocha (@IbaneisOficial) January 8, 2023
Намойишчиларнинг хатти-ҳаракатлари ҳозир АҚШда бўлиб турган Жаир Болсонаро томонидан ҳам танқид қилинди. Унинг таъкидлашича, ўз тарафдорларининг ҳаракати демократия доирасидан ташқарида.
«Ҳуқуқий шаклдаги тинч намойишлар демократиянинг бир қисмидир. Бироқ бугунги кунда содир бўлган, шунингдек, 2013 ва 2017 йилларда сўлчилар томонидан амалга оширилган жамоат биноларини талон-торож қилиш ва тортиб олиш бу қоидага кирмайди», — деб ёзди у Twitter`да. Лотин Америкаси ва Кариб ҳавзаси ҳамжамияти Бразилия президенти ва ҳукуматини қўллаб-қувватлашини билдирди.
— Manifestações pacíficas, na forma da lei, fazem parte da democracia. Contudo, depredações e invasões de prédios públicos como ocorridos no dia de hoje, assim como os praticados pela esquerda em 2013 e 2017, fogem à regra.
— Jair M. Bolsonaro 2️⃣2️⃣ (@jairbolsonaro) January 9, 2023
