Буюк Британиянинг Oxford Insights консалтинг компанияси ва Канаданинг Халқаро тадқиқотларни ривожлантириш институти ҳукуматларнинг сунъий интеллектга тайёрлик индекси бўйича 2022 йилги натижаларни эълон қилди.
Ўзбекистон ушбу индекснинг 2022 йилги ҳисоботида 44,51 балл билан 181 та мамлакат ичида 79-ўринни эгаллаб, 2021 йилга нисбатан 14 поғона юқорилаган.
Инфографика: Government Artificial Intelligence Readiness Index
Йиллар кесимида қаралганда Ўзбекистон
- 2019 йилда 194 та мамлакат орасида 158-ўринда;
- 2020 йилда 172 та мамлакат орасида 95-ўринда;
- 2021 йилда 160 та мамлакат орасида 93-ўринда қайд этилган.
Ўзбекистон индекснинг «ҳукумат» йўналиши бўйича 49,90 балл билан 68-ўринни, «технологик салоҳият» йўналиши бўйича 24,45 балл билан 121-ўринни ҳамда «маълумот ва инфратузилма» йўналиши бўйича 59,17 балл билан 70-ўринни эгаллаган.
Ушбу рейтингда АҚШ (85,72 балл), Сингапур (84,12 балл), Буюк Британия (78,54 балл), Финляндия (77,59 балл), Канада (77,39 балл), Жанубий Корея (76,76 балл), Франция (75,78 балл), Австралия (75,29 балл), Япония (75,25 балл) ҳамда Нидерландия (75,11 балл) топ-10 таликдан жой олган.
МДҲ давлатлари ўртасида Ўзбекистон нисбатан қуйи ўринда қайд этилиб, ташкилотга аъзо 9 мамлакат ичида 4-ўринни эгаллаган. Мамлакат аъзо давлатлар орасида индекснинг бирор йўналиши бўйича етакчиликни қўлга кирита олмаган. Технологик салоҳият йўналишида эса қуйи ўринларнинг бирида қайд этилган.
Бундан ташқари, индексдаги жами 39 та кўрсаткичдан 21 тасида Ўзбекистон 100-ўриндан қуйи поғоналарни эгаллаган Хусусан, муҳандислик ва технология олий таълим сифати (170-ўрин), STEM бўйича аёл битирувчилар (167-ўрин), тадқиқот ва ишланмалар харажатлари (155-ўрин), Венчур капиталининг мавжудлиги (147-ўрин) кўрсаткичлари бўйича дунёнинг энг қолоқ мамлакатлари билан билан бир қатордан жой олган.
Маълумот учун, индекс (Government Artificial Intelligence Readiness Index) 2017 йилдан буён ҳар йили эълон қилиб борилади. Унда мамлакатнинг сунъий интеллектга тайёргарлик даражаси 3 та йўналиш ва 39 та кўрсаткич ёрдамида аниқланади. Бу кўрсаткичлар 10 та гуруҳга бўлинади. Индекс фақат йўналишлар ва кўрсаткичлар асосида ҳисобланади, гуруҳлар бўйича мамлакатларнинг ўрни аниқланмайди.
