Фарғона, Наманган ва Андижон вилоятларининг газ таъминотини яхшилаш учун 95 километр узунликдаги «Янгиер-Оҳангарон» магистраль газ қувури қурилмоқда, дея хабар қилди Энергетика вазирлиги.
Қайд этилишича, бугунги кунда объект қурилиши учун 47 километрдан ортиқ қувур олиб келинган ва 6 километр қисми монтаж қилинган. Янги магистраль газ қувури 2023 йилнинг учинчи чорагида ишга туширилиши режалаштирилган.
«Газ қувури ишга тушгач, водий вилоятларининг газ таъминоти янада яхшиланишига эришилади», — дейилади вазирлик хабарида.
Эслатиб ўтамиз, Ўзбекистон Туркманистондан табиий газ импортини ошириш бўйича келишувга эришганди. Шартномага кўра, уч ой ичида 1,5 млрд куб метрга яқин газ импорт қилиниши режалаштирилган, бу эса қиш мавсумида тақчилликни қоплашга ёрдам бериши маълум қилинган.
Reuters маълумотларига кўра, бугунги кунда мамлакат кунига ўртача 15 млн куб метр газ импорт қилади. Яна қўшимча 20 млн куб метр газ етказиб берилиши қиш мавсумида газ тақчиллигини қоплайди.
