«Koʻzgu» Youtube канали (227 минг обуначига эга) муаллифи блогер Абдуқодир Мўминов шанбага ўтар кечаси уйи ёнида ниқобли номаълум шахслар унга ҳужум қилгани ҳақида хабар берди.
Бир нечта онлайн трансляцияларда у воқеа тафсилотларни айтиб берди ва бейсбол битаси билан ойнаси синдирилган машина қандай кўринишда экани, шунингдек, боши ва қўлидаги жароҳатларни кўрсатди.
Унинг сўзларига кўра, у машина ичидалигида номаълум шахслар машинага бир неча зарбалар берган, зарба блогернинг қўлларига ҳам тегган. «Агар ўша вақтда кетишга муваффақ бўлмасам, нима бўларди, билмайман», — деди у.
Блогернинг сўзларига кўра, ҳужум қилган шахслар беш нафарга яқин бўлган. У 102 рақамига қўнғироқ қилиб, ҳужум содир бўлган жойга қайтиб келган. Блогер воқеа жойига қайтганда у ерга аллақачон милиция ходимлари етиб келганини кўрган.
У шахсий хавфсизлиги ва содир бўлаётган воқеаларни ёзиб олиш учун бир неча соат жонли эфирда бўлди.
Блогернинг айтишича, автомашинасининг видеорегистраторидаги USB флеш-дискини расмийлаштирмасдан, унинг розилигисиз олиб кетилган. Флеш-дискда ҳужум қилган шахслар билан суҳбатлари ёзиб олинган бўлган.
Видеода жуда кўп одамлар борлиги кўрсатилган. Абдуқодир Мўминов турли одамларнинг олдига келиб, флешка унинг шахсий нарсаси эканини айтиб, қайтариб беришни сўради. Ундан вақти-вақти билан тасвирга олишни тўхтатиш сўралди ва флеш-дискни қайтариб бериш ваъда қилинди.
Шунингдек, у телефони мусодара қилинганини, унда унинг журналистик фаолияти доирасида бошқа шахслар билан суҳбатлар қайд этилганини айтди.
Ўз видеоларида блогер ҳокимиятни танқид қилиб, партия тузиш истагини билдирган.
Ҳозирча ҳодиса юзасидан расмий изоҳ берилмаган.
