Ўзбекистон президенти Шавкат Мирзиёевнинг мамлакат парламентига йўллайдиган мурожаати жонли эфирда намойиш этилади. Тадбир сешанба куни соат 11:00 да бошланади.
Уни «Ўзбекистон 24», «O'zbekiston», «Yoshlar» ва «Mahalla» давлат телерадиоканаллари, «Madaniyat va ma’rifat», «Dunyo bo’ylab», «Toshkent» ва «O'zbekiston tarixi» телеканаллари орқали томоша қилиш ва тинглаш мумкин бўлади.
Шунингдек, «Mening yurtim», «Sevimli», «UzReport TV», «Milliy» ва «Zo'r TV» хусусий телеканаллари томонидан ҳам эфирга узатилади.
Интернет тармоғида давлат раҳбарининг ижтимоий тармоқлардаги (Telegram, Facebook ва бошқалар) каналлари ҳамда mtrk.uz ва uztv.uz сайтларида (ТВ каналларидан бирини танлаб) кузатиш мумкин бўлади.
Шавкат Мирзиёев 2017 йил 22 декабрь куни Олий Мажлисга биринчи Мурожаатномасини тақдим этганди. Ўшанда тадбир тўрт соат давом этди. Кейинги учта мурожаат — 2018 йил 28 декабрь, 2020 йил 24 январь ва 2020 йил 29 декабрь куни бўлиб, тахминан уч соат давом этди.
Мурожаатномада президент анъанага кўра ўтаётган йил якунларини сарҳисоб қилади, келаси йил номини эълон қилади ва келажак учун қатор ташаббуслар билан чиқади.
