ДХХ ҳамда Иқтисодий жиноятларга қарши курашиш Департаментининг Тошкент шаҳар бошқармаси билан ҳамкорликда пойтахтда ўтказилган тезкор тадбирлар натижасида фирибгарлик билан боғлиқ ҳолатларга чек қўйилди, деб хабар бермоқда UzA агентлиги.
Маълум бўлишича, Олмазор туманида ўтказилган тезкор тадбирда Тошкент, Жиззах ва Сирдарё вилоятларида яшовчи 6 нафар шахс ўзаро келишган ҳолда Чилонзор туманида жойлашган кўчмас мулк ҳужжатларини сохталаштириб, харидор номига расмийлаштириб бериш эвазига унинг 150 минг АҚШ доллари миқдоридаги пул маблағини ўзлаштирмоқчи бўлган вақтида қўлга олинди.
Шунингдек, Яшнобод туманида ўтказилган тезкор тадбирда эса Тошкент вилоятининг Бекобод ва Бўка туманларида яшовчи, Тошкент шаҳридаги ОТМлардан бирининг 2 нафар талабаси аризачининг укасини Ўзбекистон давлат жисмоний тарбия ва спорт университетига ўқишга киритиб қўйиш эвазига 5 минг АҚШ доллари олган вақтида ушланди.
Бошқа ҳолатда эса Сергели туманида яшовчи, 1984 йилда туғилган шахс мансабдор танишлари орқали Сариосиё (Сурхондарё) туманида яшовчи фуқаронинг Бутунроссия давлат адлия университетини тамомлаганлиги тўғрисидаги дипломини нострификация қилиш бўйича имтиҳондан ўтишида ёрдам бериш эвазига ундан 4 минг АҚШ доллари олган вақтида ушланди.
Ҳозирда мазкур ҳолатлар юзасидан Жиноят Кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
