Оғир атлетика бўйича Колумбиянинг Богота шаҳри мезбонлик қилаётган жаҳон чемпионатида ўзбекистонлик Руслан Нурудинов -109 кг вазн тоифасида мутлақ жаҳон чемпиони бўлди. Бу ҳақда Миллий олимпия қўмитаси матбуот хизмати хабар бермоқда.
У даст кўтариш машқида 177 кг, силтаб кўтаришда 220 кг ва умумий ҳисобда 397 кг тош кўтара олди ҳамда 3 йўналишда олтин медалларга эгалик қилди. Бу унинг фаолиятида иккинчи жаҳон чемпионатидаги ғалаба бўлди. Бундан олдин 2013 йил Россияда ўтган жаҳон чемпионатида ҳам у умумий ҳисобда 425 кг тош кўтариб мутлақ устунликка эришган ва олтин медаль олганди.
Ушбу вазн тоифасида кучли учликдан ўрин олган эркаклар:
- Руслан Нурудинов (Ўзбекистон) — 397 (177+220) кг;
- Гиорги Чхеидзе (Грузия) — 389 (170+219) кг;
- Рафаэл Кастилё (Колумбия) — 388 (174+214) кг.
Руслан Нурудинов халқаро майдондаги дастлабки ғалабасини 2009 йили Бирлашган Араб Амирликларида ўтган ўсмирлар ўртасидаги Осиё чемпионатида қўлга киритган ва олтин медалга сазовор бўлган. 2011 йили Франциядаги жаҳон чемпионатида штангани силтаб кўтаришда кумуш медални қўлга киритган. 2012 йили Жанубий Кореяда ўтган Осиё чемпионатида ғолиб чиққан ва Лондон Олимпиадасида кучли тўртликдан жой олган.
Кейинроқ оғир атлетикачининг текширувдан ўтказилган 2012 йилги допинг намунаси мусбат натижа берган. Халқаро оғир атлетика федерацияси уни вақтинча спортдан четлатиб, Олимпиадада эришган натижалари, жумладан баллари бекор қилиниб, медал ва совринлари мусодара этилиши ҳақида маълум қилинган эди.
2013 йил оғир атлетикачи учун ҳар томонлама муваффақиятли бўлди. Дастлаб мамлакат чемпионатида ғалаба қозонган Руслан Осиё чемпионатида ҳам учта олтин медални қўлга киритди. Июль ойида Жаҳон унивесиадасида икки маротаба рекорд ўрнатиб, чемпион бўлган.
2016 йилги олимпиадада оғир атлетикачи Руслан Нуридинов силтаб кўтаришда Олимпия рекордини янгилаб, Риодаги ўйинларда олтин медални қўлга киритган.
