Халқ депутатлари Наманган шаҳар кенгаши депутати Музаффар Жамолитдинов фикрича, ижтимоий тармоқларда қамалиб чиқмаган одамларгина газ ва электр таъминоти муаммоларидан нолимоқда. У бу ҳақда Facebook’даги саҳифасида пост қолдирган, жамоатчиликнинг танқидидан сўнг эса ёзувларини ўчириб ташлаган.
«Ижтимоий тармоқда газ ва свет йўқлигидан нолиётганларнинг шахсини суриштириб кўринг — бирортаси қамалиб чиққан одам эмас. Яъни, қамалиб, озодликдан маҳрум бўлганлар озодлик, эркинлик ва тинчликнинг қадрига шу даражада кўп етадики, газ-свет муаммоси аҳамиятсиз бўлиб қолади», — дея таъкидлаган у.
Унинг сўзларига кўра, қамалиб чиққан одам «қўрққанидан эмас, [балки] тинчлик ва хотиржамликнинг қадрини билганидан газ-свет муаммосини гапирмайди».
«Яъни, тинчлик ва хотиржамлик, озодлик ва эркинлик бебаҳо, тенги йўқ, катта неъмат. Шамда ўтирсанг ҳам уйингда ўтир, ИИБнинг камерасида эмас. Совуқда ўтирсанг ҳам бола-чақангнинг олдида ўтир, миллий хавфсизлик (ДХХ — таҳр.)нинг камерасида эмас. Метанга навбатда турсанг ҳам майли, Уйчи [туман] турмасининг санчастида навбатда турма», — деб ёзди депутат.
Музаффар Жамолитдиновнинг қўшимча қилишича, Уйчи туман қамоқхонаси камералари «иссиқ ва ёруғ». «У ерда ҳеч қачон свет ўчмайди, камералар совуқ кирадиган очиқликда эмас, ҳамма жойи ёпиқ», — дея маълум қилди у.
Олий Мажлис Қонунчилик палатаси депутати Расул Кушербаев бунга жавобан «фуқароларни энергия таъминотидаги муаммолар ҳақида гапиртирмаслик, тинчликнинг қадрига етиш учун уларга қамоқ билан таҳдид қилиш демократик жамиятга хос бўлмаган услуб» эканини таъкидлаб ўтди.
«Ачинарлиси, бундай баёнотларнинг халқ сайлаган (сайлаган бўлса) халқ вакилларидан чиқиши ҳеч бир қолипга сиғмайди. Бу каби дунёқарашга эга, билим ва савияси паст, сайловчилар манфаатини ҳимоя қилмайдиган шахсларнинг депутат мақомига эришиб қолаётганлиги аслида энг катта фожиамиздир», — деб ёзди у.
Кейинроқ Музаффар Жамолитдинов унинг биринчи галдаги мақсади одамларни қўрқитиш ёки уларга таҳдид қилиш эмас, балки тинчлик ва хотиржамликнинг қадрига етишга чақириш бўлганини тушунтиришга уринди.
«Нима учун ушбу постда айнан қамоқ билан боғлиқ ҳолатга тўхталганимга изоҳ бермоқчиман. Бундан 6 йил аввал бир ишда айбланиб, 10 ой қамоқ эҳтиёт чораси билан турмада сақланганман. Шунда оилавий хотиржамлик ва тинчлик ҳамма нарсадан устунлигини англаб етганман. Мен 10 ой давомида кечирган ташвишларим шу даражада оғир бўлганидан ҳамда яна қайтадан тикланиш жуда қийин бўлганидан, айни кундаги электр ва газ билан боғлиқ муаммолар, ўз назаримда, енгилдек туюлди», — деди у.
Унинг сўзларига кўра, у ижтимоий тармоқларда комумнал муаммолар билан боғлиқ турли видеороликларни кўрганидан сўнг, у «бундан ҳам оғир ташвишларда юрганлар бор» деган фикрда пост жойлаган.
«Мен жойлаган постни таҳдид деб қабул қилган фуқаролардан постимни тўғри қабул қилишларини сўраб, узр сўрайман», — дея таъкидлаган у.
Музаффар Жамолитдинов шу постида депутатлик ваколатини муддатидан аввал тугатиш ҳақида ариза берганини маълум қилган. Халқ депутатлари Наманган шаҳар кенгаши котибияти раҳбари Носир Убайдуллаевнинг «Газета.uz»га маълум қилишича, кенгашнинг доимий комиссияси йиғилишида депутат Жамолитдиновнинг аризаси кўриб чиқилган ва қаноатлантирилган.
