Фарғона вилояти Тошлоқ туманида профилактика инспектори табель қуроли билан ўзини отиб қўйди, дея хабар бермоқда вилоят ИИБ матбуот хизмати.
5 декабр куни тунги хизматга чиққан туман ИИБ профилактика инспектори катта лейтенант А.У. ИИБда ўтказилган эрталабки йўриқномага келмаган ҳамда у билан боғланишнинг имкони бўлмаган.
Ўтказилган суриштирув ишлари давомида катта лейтенант А.У. яшаш хонадонидан тахминан 3 км узоқликдаги Бесаранг қишлоғи ҳудудидан оқиб ўтувчи Катта Фарғона канали ёқасидаги йўлининг четида ўзига тегишли бўлган Spark автомобилида ўзига бириктирилган ПМ табель қуроли билан бош қисмидан жароҳатланган. Ходим кома ҳолатда топилган ва тиббий муассасага жойлаштирилган.
Аниқланишича, у 1xbet иловасидан фойдаланиб, август ойида 45 млн сўм ютқазганлиги учун қарздорлик муаммоси ҳал этилиб, интизомий тартибда жазоланган ҳамда вилоят ИИБ қошидаги Интизомий кенгашнинг назоратида бўлган.
Ҳозирда ҳолат вилоят прокуратура органлари томонидан ўрганилмоқда.
