Самарқандда погонини ўз юлиб, аёл кишини айблашга уринган ИИБ ходимига чора кўрилмади. Бу ҳақда 1 декабрь куни АОКАда ўтказилган ИИВ масъуллари иштирокидаги матбуот анжуманида маълум қилинди, дея хабар бермоқда «Газета.uz» мухбири.

Гап шундаки, 2021 йилда ички ишлар ходими аёл кишини прокуратура биносидан чиқаришга уринаётганида ўз қўли билан хизмат кийимидаги погонини юлиб ташлаган. Ҳолат бўйича қўзғатилган жиноят иши якунида суд аёлни профилактика инспектори Ф.Раджабовнинг хизмат кийимидан погонини йиртиб ташлаган деган хулосага келган.

Ўзбекистон инсон ҳуқуқлари «Эзгулик» жамияти эълон қилган видеоларда эса бунинг умуман аксини, яъни ходимнинг ўзи аёлнинг бир қўлини ушлаб олган ҳолда, иккинчи қўли билан ўзининг погонини ўзи юлиб ташлаган.

Декабрь бошида пойтахтда ўтказилган анжуманда ИИВ департаменти бош инспектори Наврўз Набиев ҳолат юзасидан маълумот берди. Унинг сўзларига кўра, воқеа 2021 йил 15 июль куни Қўшработ тумани прокуратураси биносида содир бўлган. Фирибгарликда айбланиб, тергов қилинаётган эркакнинг синглиси ва қизи прокуратурага келиб, тўполон кўтарган.

«Жиноят кодексининг 168-моддаси 2-қисми „б“ банди (Фирибгарлик), 28-модда орқали 211-моддаси 1-қисми (Пора бериш) билан қўзғатилган жиноят иши бўйича айбланувчи Шосимов мажбурий тартибда туман прокуратураси биносига олиб келинган. Шу куни айбланувчининг синглиси ва қизи прокуратурага келишиб, прокуратура ходимларини ҳақорат қилишган. Шу сабабли воқеа жойига Қўшработ тумани ИИБ ходимлари чақиртирилган», — деди у.

Унинг сўзларига кўра, профилактика инспектори катта лейтенант Ражабов, лейтенант Бобоқулов ҳамда лейтенант Шарипов прокуратурага етиб келганида аёллар ички ишлар ходимларининг қонуний талабларини бажармасдан уларни ҳақорат қилган, Ражабовга тегишли бўлган автомобилнинг ойналарини синдириб, эшикларини пачақлаган.

«Интернетда тарқалган видеода катта лейтенант Ражабов фуқаро Шосимованинг қўлидан ушлаб прокуратура биносидан олиб чиқиш жараёнида ўзининг эгнида бўлган сипоҳли кийимидаги погонини юлиб олганлиги тасвирланган. Бу бўйича Самарқанд вилоят ИИБ ҲПБ томонидан хизмат текшируви ўтказилган, унинг натижаси бўйича қарор қабул қилинган. Қарорга асосан ички ишлар ходимининг хатти-ҳаракатига қонуний баҳо бериш учун ҳужжатлар прокуратура органига юборилган», — дея қўшимча қилди ИИВ вакили.

Наврўз Набиевнинг таъкидлашича, прокуратура томонидан жиноят иши қўзғатилиб, ички ишлар ходими ва фуқароларнинг кўрсатмаларида бир-бирига зид маълумотлар бўлгани ва тергов жараёнида аниқланган бошқа фактлар ва гувоҳларнинг кўрсатмаларига асосланиб, фуқаро Шосимовага нисбатан Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган ва унга нисбатан бир йил муддатга ахлоқ тузатиш ишлари тайинланган.

Унинг қайд этишича, погонини юлиб, аёлни айблаган ички ишлар ходими ҳозирги кунда хизмат фаолиятини давом эттирмоқда. «Ходимнинг ҳатти-ҳаракатларига нисбатан қандай ҳуқуқий баҳо берилгани бўйича маълумотни мазкур ҳолатни тергов қилган прокуратура органидан сўраш мумкин», — деди у.

ИИВ департамент бошлиғи ўринбосари Ҳамза Махсумов ушбу ҳолат юзасидан прокуратурадан расмий маълумот олиб, ОАВга тақдим этилишини маълум қилди.

Эслатиб ўтамиз, Ўзбекистон инсон ҳуқуқлари «Эзгулик» жамияти мазкур ҳолатга бирор орган тўлиқ ҳуқуқий баҳо бермади дея таъкидлаган.

«Прокуратура тергов органлари ҳам, жиноят ишлари бўйича судлар ҳам жиноят ишининг барча ҳолатларига тўлиқ ҳуқуқий баҳо бермади, шунингдек ишда мавжуд бўлган ашёвий далилларни очиқдан-очиқ эътиборсиз қолдирди. Хусусан, ҳеч қандай ускунасиз икки аёл қандай қилиб туман прокуратурасининг қўриқланадиган биносига мустақил равишда кира олгани баҳоланмаган», — дейилади хабарда.

Қолаверса, жамият маълумотига кўра, қуйидаги саволларга жавоб берилмаган: Прокуратура биносини қўриқлаш ва унда жамоат тартибини сақлаш вазифаси бўлган Миллий гвардия ходимлари воқеа юз берган вақтда қаерда бўлган? Терговчи А.Хакбердиев нимага эшик олдида Миллий Гвардия ходимлари турганида жамоат тартибини сақлашга ички ишлар бўлими ходимларини чақирган?

«Бундан ташқари, ишга оид материаллардаги видео ёзувларида ишчи ишлар ходими профилактика инспектори Ф.Раджабов шахсан ўзи погонини юлиб олиб, бунда аёлни айблаётгани аниқ-тиниқ кўриниб турибди. Видеода ўша вақтда аёлнинг чап қўли сумкасини ушлаб турганини, ўнг қўлини эса ички ишлар ходими ушлаб турганини кўриш мумкин», — дейилади «Эзгулик» жамияти хабарида.

Ушбу ҳолатларни инобатга олган ҳолда «Эзгулик» жамияти — биринчи ва апелляция инстанциялари судьяларининг ҳукми адолатсизлиги, судьяларнинг хатти-ҳаракатларида эса ЖКнинг 231-моддасида (Адолатсиз ҳукм, ҳал қилув қарори, ажрим ёки қарор чиқариш) назарда тутилганидек, айбсиз шахсни қонунга хилоф равишда жавобгарликка тортиш аломатлари мавжуд деган хулосага келган.

Бундан ташқари, профилактика инспектори Ф.Раджабовнинг хатти-ҳаракатларида ЖКнинг 237-моддаси (Ёлғон хабар бериш) ва 238-моддасида (Ёлғон гувоҳлик бериш) назарда тутилган жиноятлар аломатлари бор. Ф.Раджабов ўзига тегишли хизмат формасидаги, ўз раҳбарияти томонидан берилган погонини юлиб ташлаш орқали фуқаролик бурчини шараф билан бажарган ва бажаришда давом этаётган ички ишлар ходимларининг қадр-қимматини ҳақорат қилди, деб ҳисоблайди жамият.

2022 йилнинг май ойидаёқ «Эзгулик» жамияти Омбудсман ҳамда Оила ва хотин-қизлар қўмитасидан ушбу вазиятга эътибор қаратишни ҳамда аслида жабрланувчи ҳисобланган аёлнинг ҳуқуқ ва манфаатларини ҳимоя қилишни сўраган. Бироқ ҳозирга қадар ушбу ташкилотларнинг бирортасидан жавоб бўлмади.

Ўшанда «Эзгулик» жамияти раиси Абдураҳмон Ташанов ўзининг Facebook`даги саҳифасида Самарқанддаги бундай ҳодисаларда айбланган ходимларнинг муносиб жазо олишига ишонмаслигини қайд этган. «Чунки асл вазиятни ҳамма кўриб турибди. Бундай юзсизликка кўникиб ҳам қолдик», — деганди у.