UzAuto Motors компанияси Chevrolet Gentra (Lacetti) седанини ишлаб чиқаришни тўхтатишни режалаштирмоқда. UzAuto Motors акцияларининг бирламчи оммавий таклифи (IPO) андеррайтери ҳисобланган Freedom Broker компанияси сайтида бу ҳақда сўз боради.
Автомобиллар моделларининг ҳаётий цикллари ҳақидаги слайдда Gentra цикли 2023 йил охирида тугашини кўриш мумкин. Худди шундай белгилар Spark ва Nexia моделларида ҳам қайд этилган — UzAuto Motors аввалроқ уларни ишлаб чиқариш 2022 йил охирида тугаши ҳақида билдирган эди.
Тақдимотга кўра, компания 2023 йил иккинчи чорагидан Cadillac русумли автомобиллар (General Motors компаниясининг люкс бренди) савдосини бошлашни режалаштирмоқда. Бундан ташқари, 2026 йилдан янги Chevrolet моделини ишлаб чиқариш белгиланган, бироқ айнан қайси модел экани кўрсатилмаган.
Компания моделлари ҳаётий циклининг Cobalt бўлимида Next generation (янги авлод) ёзувини кўриш мумкин. Аввалроқ 2024 йилдан янгиланган моделни ишлаб чиқариш режалаштирилаётгани ҳақида хабар берган эдик.
Ҳужжатда бошқа моделлар цикллари ҳам кўрсатилган. У ерда жорий йилдан Trailblazer савдоси тўхтатилиши ва келгуси йил бошидан янги Captiva, шунингдек, 2023 йил охирида янги авлод Equinox, 2024 йил бошидан эса Traverse пайдо бўлиши қайд этилган.
