Тошкентда Учтепа тумани 5-Фозилтепа сайлов округидан Халқ депутатлари Тошкент шаҳар Кенгаши депутати дарахтларни кесишга рухсат берувчи ҳужжатга муҳр босмагани учун Юнусобод тумани Тикланиш МФЙ раисининг хонасида сўкингани акс этган видео ижтимоий тармоқларда тарқалди.

Унга кўра, депутат, ХДП аъзоси Улуғбек Ҳамидов Тикланиш маҳалласи Холис 1а-кўчада бир фуқаронинг уйини сотиб олиб, участка қуришни бошлаган. (Унинг ўзи 150 м наридаги 80-хонадонда яшайди). Уй олдида 2 та катта дарахт борлиги сабаб, қурилиш объектига катта машина кириб-чиқа олмаётгани, уни кесиб қурилиш материали учун мебель ясаш учун руҳсат беришини сўраб ариза ёзиб, маҳалла раиси олдига борган. Уни кутиб олган ҳоким ёрдамчиси ҳоким йўқлигини айтиб, телефон орқали ҳоким билан боғланган. Алоқа вақтида маҳалла раиси аризага муҳрни у босмаслиги, бунинг учун «Ягона дарча» марказига бориши кераклигини айтган ва телефонни ўчирган. Депутат эса бундан ранжиб, хонадан ҳақорат сўзларини айтиб чиқиб кетган.

«Газета.uz» билан суҳбатда бўлган Юнусобод тумани Тикланиш МФЙ раиси Тохир Сабиров дарахт кесишга руҳсат бериш, далолатнома тузиш унинг ваколатига кирмаслиги, видеодаги айтилган ҳақоратли сўзлар бўйича депутат устидан ариза берганини маълум қилди.

«Бу ерда келиб у „Мен депутатман“ деб мурожаат қилмади, дарахт кесиш бўйихҳа мурожаат қилди. Унинг депутат эканлигини мен маҳалла нозири чақирганда билдим. У „Мендан тушунтириш хати ололмайсан, мен депутатман“ деган. Тартибга кўра, дарахт кесишга руҳсат бериш, далолатнома тузиш бизнинг ваколатимизга кирмайди. Фақат „Ягона дарча“ маркази орқали Экология қўмитасига чиқилади. Кесишга фақат „Экология“ бошқармаси руҳсат беради», — дея таъкидлади у.

Шунингдек, у видеода айтилган ҳақоратли сўзлар бўйича шикояти ҳам борлигини маълум қилди.

«Сўкингани учун мен унинг устидан ариза бердим. Маҳалла нозири мендан ҳам, ундан ҳам тушунтириш хати олди. Мен фақат депутатга нисбатан чора кўришларини сўрайман, бўлди бошқа ҳеч нарса эмас. У менинг гўрда ётган онамни сўкди», — деди маҳалла раиси.

Бунга нисбатан депутат, ХДП аъзоси Улуғбек Ҳамидов у маҳалла оқсоқолини сўкмаганини таъкидлади. Айтишича, у раис билан «нормално» гаплашган, вазият ўзгармагани сабаб уй қурилиши кечикаётгани учун ўзига-ўзи нолиган.

«Мен маҳалла оқсоқолини сўкмаганман. У билан „нормално“ гаплашганман. „Бу нарсани мен қилиб бермайман, мумкин эмас“, дегандан сўнг 5 марта шу ерга оворагарчилик билан чиққаним, қурилиш ишларим тўхтаб қолганига, бюрократизм экан деган маънода ўзимга-ўзим бекорга овора бўлибман деб сиқилиб кетиб, [гапирдим]. Мана шу ҳолатда улар буни ўзларига PR қилиб олиб чиқишяпти, холос. Агар оқсоқол билан ўзим телефонда гаплашганимда, уни сўккан бўлишим мукин эди», — деди у.

Унинг таъкидлашича, бу ерда депутатнинг аввалдан оқсоқол билан эски имзоси бўлган. «Бўлар-бўлмасга олдиндан туҳмат қилиб келганлар. Шунинг учун мана шу мавзуни айлантиряптилар, деб ўйлайман. Кўп марта унинг олдига бордим, маҳалла раиси „ҳали кел, эрта кел“, деб жавоб берди. Охирги марта ўзим чиққанимда, у вақтда ҳоким ёрдамчиси менга оқосоқолни улаб берди. Кейин у видео ўртасидаги ҳолатни „келтириб бера олмади“. Ундан сўнг бўлар-бўлмас туҳматлар қилди, бу бўйича ариза ҳам берилди», — дея таъкидлади депутат.

Таъкидланишича, ҳозирда ҳолатга ҳуқуқий баҳо берилиши учун ИИО томонидан кўриб чиқилмоқда.