26 ноябрь куни Навоий кон металлургия комбинатида портлатиш ишлари давомида машинист ҳалок бўлди, дея хабар бермоқда Навоий вилояти прокуратураси матбуот хизмати.
Маълум бўлишича, комбинатнинг Шимолий кон бошқармасига қарашли «Шарқий» конида портлатиш ишлари олиб борилган ҳудудда руда тошларни олиш ишлари билан шуғулланаётган ЭКГ-40 русумли экскаватор кабинасига тоғ жинслари кўчмаси сачраб тушган. Оқибатда кабинада бўлган машинист Ш. Ш. жароҳат олиб, воқеа жойида вафот этган.
Бундан ташқари, ЭКГ-40 русумли экскаватор кабинасида бўлган машинист ёрдамчиси Т.М. «бўйин ва ўнг қўл кафт сохаси 1 ва 2-даражали куйиши» жароҳатини олган.
Ҳолат юзасидан ИИВ ҳузуридаги 2-сон ИИБ тергов бўлинмаси томонидан терговга қадар текширув ҳаракатлари олиб борилаётган бўлиб, судга оид тиббий экспертиза тайинланган.
Терговга қадар текшириш ҳаракатлари Зарафшон ихтисослаштирилган прокуратураси томонидан назоратга олинган.
