Олий Мажлис Қонунчилик палатасининг навбатдаги ялпи сессиясида молия вазири Тимур Ишметов «2022 йил учун Ўзбекистон Республикаси Давлат бюджети тўғрисида»ги қонунга киритилаётган ўзгартириш ва қўшимчалар ҳақида бирламчи маълумотларни тақдим этди.
Киритилаётган қўшимча харажатлар эвазига республика консолидациялашган бюджет тақчиллиги 3 фоиздан 4 фоизга оширилмоқда.
Ноябрь ойининг бошида ҳукумат бюджет тақчиллигининг амалдаги чекланган миқдорига мослаша олмаётгани боис парламентдан уни 4 фоизгача оширишни сўраганди, бу эса давлат харажатларининг 8 трлн сўмга ошишини англатади.
Шунингдек, 2022 йил учун ҳукумат номидан ва давлат кафолати остида ташқи қарзларни жалб қилиш бўйича чиқариладиган давлат қимматли қоғозларининг чекланган соф ҳажми 6 трлн сўм миқдорида белгиланганди. Биринчи ярим йилликда давлат бюджетини молиялаштириш учун чиқарилган давлат қимматли қоғозларининг соф ҳажми 2 трлн сўмни ташкил этди.
Тимур Ишметовнинг сўзларига кўра, ушбу миқдор икки баробарга ўзгартирилиб, 12 трлн сўм этиб белгиланди.
Шу билан бирга, президент ва ҳукуматнинг устувор топшириқларини бажариш учун республика бюджетидан биринчи даражали бюджет маблағларини тақсимловчиларга ажратилган маблағларнинг чекланган миқдорлари қарийб 21 трлн сўм қўшимча харажатлар ҳисобига оширилмоқда.
Молия вазири Самарқандда бўлиб ўтган саммитда Ўзбекистон фискал мувозанатни таъминлаш учун бюджет тақчиллигини камайтиришга эътибор қаратиши керак, деб айтганди. «Барча харажатларни қисқартириш талаб этилса ҳам, бизнинг сиёсат инфляцияга қарши курашиш билан мувофиқ бўлиши керак. Бу фаровонликка хизмат қилади», — деди у.
