Давлат статистика қўмитаси маълумотларига кўра, 2022 йилнинг ўтган 9 ойи давомида Ўзбекистонда жами асосий капиталга ўзлаштирилган инвестициялар ҳажми қарийб 190 трлн сўмни ташкил этди. Ўтган чорак (122 трлн сўм) билан солиштирганда инвестициялар миқдори 68 трлн сўмга кўпайган.
Учинчи чоракда асосий капиталга ўзлаштирилган инвестициялар суръати бўйича Сирдарё (127,6%) ва Самарқанд (122,5%) вилоятлари ҳамда Қорақалпоғистон республикаси (118,9%) етакчи ўринни эгаллади.
Энг кам ўзлаштириш бўйича эса Бухоро вилояти — (98,5%), Тошкент шаҳри — (97,6%) ва Қашқадарё вилояти — (96%) қайд этилди.
Статистикага кўра, асосий капиталга ўзлаштирилган инвестициялар бўйича Тошкент шаҳрида энг юқори кўрсаткич 2021 йилнинг иккинчи чорагида 24 трлн сўм ҳисобида (120%) қайд этилган.
Пойтахтда инвестицияларни ўзлаштириш суръати ўтган йилнинг 3 чорагидан бошлаб пасайиб келганига қарамасдан унинг ҳажми номутаносиб тарзда камайган ёки ўсган.
Тошкент шаҳри | |||||
| 2021 йил 3 чорак | 2021 йил 4 чорак | 2022 йил 1 чорак | 2022 йил 2 чорак | 2022 йил 3 чорак | |
| Асосий капиталга ўзлаштирилган инвестициялар ҳажми (сўмда) | 37,4 трлн | 58,1 трлн | 8,5 трлн | 25,7 трлн | 41 трлн |
| Аҳоли жон бошига асосий капиталга ўзлаштирилган инвестициялар ҳажми (сўмда) | 13,3 млн | 20,6 млн | 2,9 млн | 8,9 млн | 14,1 млн |
| Ўсиш суръати (фоизда) | 115% | 105% | 98,7% | 94,6% | 97,6% |
Тақдим этилган маълумотларга кўра, республика бўйлаб энг паст кўрсаткичлар 2022 йилнинг биринчи чорагида қайд этилди.
Шу билан бирга, ўтган чорак билан солиштирганда аксарият вилоятларда инвестицион фаоллик пасайган. Тошкент шаҳри (3%) Хоразм (4%), Сирдарё (11,5%) ва Жиззахда (3,4%) нисбатан юқори ўсиш кузатилди.
Йил бошидан бери аҳоли жон бошига ўзлаштирилган сармоялар ҳажми (I чорак 1,4 трлн сўм, II чорак 3,4 трлн сўм, III чорак 5,3 трлн сўм) ошиб борган.
Маълумот учун, 2022 йилда Тошкент шаҳрида умумий қиймати $3,8 млрдлик инвестиция жалб қилиниши режалаштирилганди. Шундан 500 та лойиҳа жорий йилнинг ўзидаёқ ишга тушиши, бунинг натижасида 27 мингта янги иш ўрни яратилиши кутилмоқда. Президент Тошкентнинг молиявий ва иқтисодий имкониятлар кенглигини, ҳар бир туманга қўшимча 100 млн доллар жалб қилиш мумкинлигини таъкидлади.
