2016 йилда пойтахтда очилган беш юлдузли Hyatt Regency Tashkent меҳмонхонасини хусусийлаштириш жараёни 2020 йилнинг январь ойида бошланган эди.

Дастлаб, The Abu Dhabi Uzbek Fund инвестиция жамғармаси ҳисобидан 110 млн доллар эвазига хусусийлаштириш режалаштирилган меҳмонхона 87 млн долларга Abu Dhabi Uzbek Investment ҚКга сотилди, деб хабар берди Давлат активларини бошқариш агентлиги матбуот хизмати.

Тегишли хусусийлаштириш дастурларига мувофиқ, агентлик меҳмонхонанинг балансда сақловчиси «Пойтахт қурилиш ва хизмат» МЧЖнинг устав капиталидаги 100% давлат улушини хусусийлаштирди.

Сотув жараёнида «KPMG Valuation and Consulting» халқаро консалтинг компанияси консультант вазифасини бажарди, акциялар пакетини мустақил баҳолаш «PricewaterhouseCoopers» томонидан амалга оширилди.

Турли хорижий инвесторларга (investor sounding) юборилган тизерлар натижасида Америка, Осиё, Европа ва Ўзбекистондаги инвесторлардан сотиб олиш бўйича қизиқиш тўғрисда 5 та аризалари (Express of Interest) келиб тушди.

Саралаш натижаларига кўра, белгиланган малака мезонларига мувофиқ бўлган талабгорлар хусусийлаштириш жараёнининг кейинги — Мажбуриятга эга бўлмаган таклифлар (NBO)ни тақдим этиш босқичида иштирок этиш учун таклиф қилинди ҳамда ахборот меморандуми, молиявий модель ва бошқа ҳужжатлар тақдим этилди.

Келиб тушган NBO`ни белгиланган малака мезонларига мувофиқлиги, минтақадаги иш фаолияти, битимни ёпиш шартлари ва меҳмохонанинг баҳоланган қийматидан юқорилиги бўйича энг яхши харид қийматини тақдим этган Abu Dhabi Uzbek Investment ҚК халқаро тендер натижалари бўйича ғолиб деб топилди.

Шунингдек, битим талабгор томонидан сотиб олиш тўловига қўшимча равишда меҳмонхонани ривожлантириш учун 12 млн АҚШ доллари миқдорида инвестиция киритиш мажбурияти билан бирга тўловни тўлиқ бир йўла тўлаш орқали амалга оширилади.

Олди-сотди шартномаси битимнинг тегишли шартлари келишилганидан сўнг, «Poytaxt qurilish va xizmat» МЧЖ ва «Hyatt International» ўртасида 2013 йилда тузилан шартномага мувофиқ Hyatt International Limited (Europe Africa Middle East) халқаро меҳмонхона бошқаруви тармоғи томонидан ғолиб маъқуллангандан кейин имзоланади.

Меҳмонхона эгаси — «Пойтахт қурилиш ва хизмат» ДУК Hyatt Regency Tashkent қурилиши қиймати 205 миллион долларни ташкил этади. Шу жумладан, «Халқ банки»нинг 7 йил муддатга жамғариб бориладиган пенсия тизимидан 100 миллиард сўмлик кредит (1 йиллик имтиёзли давр билан, йиллик 9 фоиз ставкаси билан) тақдим этилган эди. «Халқ банки» ва «Пойтахт қурилиш ва хизмат» ўртасида кредит шартномаси, истисно тариқасида, Марказий банк стандартларини қўлламасдан тузилган.

Маълумот учун, Abu Dhabi Uzbek Investment 1 млрд АҚШ долларига тенг капиталга эга бўлган инвестиция компанияси бўлиб, унинг мақсади Ўзбекистон ва БАА ўртасидаги икки томонлама иқтисодий ҳамкорликни ривожлантиришга ҳисса қўшадиган лойиҳаларга сармоя киритишдир. Компания ҳозиргача Ўзбекистон иқтисодиётининг турли тармоқларига 100 миллион АҚШ доллардан ортиқ сармоя киритган. Ушбу инвестиция компанияси портфели 300 миллион АҚШ доллардан ортиқ лойиҳаларни ўз ичига олади, уларнинг якуний мақсади яқин йилларда
1 миллиард доллардан ортиқ инвестицияларни жалб этишдир. Компания Ўзбекистон Тикланиш ва тараққиёт жамғармаси (UFRD) ҳамда БААнинг Абу-Даби тараққиёт жамғармаси (ADFD) томонидан ташкил этилган.