Tesla va SpaceX асосчиси, миллиардер Илон Маск ваниҳоят Twitter компанияси сотиб олди. Бу ҳақда тадбиркор ўзининг Twitter`даги саҳифасида видео жойлаштирди.
Шунингдек, Илон Маск саҳифасидаги маълумотларни янгилаб, компаниянинг раҳбари эканини кўрсатувчи ёзувни қолдирди (Chief Twit).
Bloomberg нашрининг хабар беришича, миллиардер душанба куни компанияни сотиб олиш бўйича битимни якунлашга ваъда берган. 13 миллиард долларлик қарз маблағларини тақдим этаётган банклар кредит шартномасини якунлаб, ҳужжатларни имзолаш босқичида турибди. Ушбу келишув тадбиркорга пул жўнатишдан олдинги охирги қадамлардан биридир.
Маълумот учун, Илон Маск Twitter`ни жорий йилнинг апрелида сотиб олмоқчи эканини айтиб, ҳар бир акция учун $54,2 қийматни таклиф этганди.
Эслатиб ўтамиз, 25 апрель — душанба куни эса Илон Маск Twitter Inc (TWTR.N) компаниясини 44 млрд долларга сотиб олиш бўйича келишувга эришгани ҳақида хабар берилганди. Шундан сўнг, июль ойида компания Илон Маскга сохта аккаунтлар ва ботлар ҳақидаги маълумотни тақдим эта олмагани ортидан тадбиркор битимни бекор қилади.
Бизнесмен октябрь ойининг бошида яна сотиб олиш истаги борлигини айтиб, узоқ давом этган муросасизликдан сўнг компаниянинг раҳбарига айланди.
