Сурхондарё вилоятининг Сариосиё тумани «Жаннатмакон» маҳалласида фуқаронинг жасади «Ҳазарбоғ» канали ирмоғидан топилиб, унда бирор-бир шахснинг жиноят таркиби аниқланмагани сабабли жиноят иши қўзғатиш рад этилди. Марҳумнинг ўлими воқеаси ҳақида унинг отаси йўллаган видеомурожаатга Сурхондарё вилояти прокуратураси расмий баёнот берди.
27 ёшли А.И.нинг жасади Олтинсой туман ИИБ навбатчилик қисмининг 10 августда берган хабарига кўра, соат 08:00 ларда топилган.
7 сентябрь куни Республика суд-тиббий экспертиза илмий-амалий маркази Олтинсой туман пункти кўрсатилган ички текширув натижаларида мархумнинг ички аъзоларидаги ўзгаришлар нафас етишмовчилиги оқибатида вафот этгани ҳақида 22-сонли хулосасини чиқарди. Бироқ, эксперт хулосасининг баёнот қисми билан хулоса қисмида номутаносиб ҳолати кузатилди. Натижада 9 сентябрь куни мурда суд ажрими асосида эксгумация қилиниб, комиссион суд тиббиёт экспертизадан ўтказилди.
12 ва 14 сентябрда бўлган қўшимча комиссион суд тиббиёт экспертиза фуқаронинг ўлимида юқори нафас йўллари бурун, оғиз бўшлиғининг суюқлик билан (сув) беркитилишидан вужудга келган механик асфикция натижасида келиб чиққан, дея хулоса берди.
Баданида аниқланган шилинмалар ва жароҳатлар эса канал бўйлаб оқиб кетаётганда юзаки жисмларга урилишидан юзага келгани, унга қаршилик кўрсатиш, уриш, тепиш, жанжаллашиш натижасида келиб чиққан тан жароҳатлари аниқланмагани айтилди.
Бирламчи хулосада ўлимга чўкишнинг нафас йўлларининг бурун, оғиз бўшлиғининг суюқлик (сув) билан бекилиши натижасидаги спастик (нафас бойламаларининг бекилиб қолиши) дан вужудга келган механик асфикция сабаб бўлгани инобатга олинмаган ва шу сабабли тафоввут келиб чиққан.
Келтирилишича, фуқаронинг ўлими ҳолати бўйича дастлабки экспертиза текшируви юзасидан хулоса беришда йўл қўйган хато ва камчиликлари учун суд-тиббий эксперт Ў.Бўтаяровга «ҳайфсан» интизомий жазо чораси қўлланди.
Терговга қадар текширув натижасида, 17 октябрь куни марҳумнинг ўлимида бирор-бир шахснинг ҳаракатларида жиноят таркиби аниқланмаганлиги сабабли Жиноят процессуал кодексининг 83-моддаси 2-бандига асосан жиноят иши қўзғатиш рад қилинди.
