Андижон вилоятининг Андижон туманига ҳамда Хоразм вилоятининг Гурлан туманига янги ҳокимлар тайинланди. Бу ҳақда ЎзА хабар бермоқда.
Маматкаримов Бахтиёр Рустамович Андижон тумани ҳокими бўлди. Тайинловга қадар у «Ўзтрансгаз» АЖ бошқаруви раисининг молия ва маркетинг бўйича ўринбосари бўлиб ишлаган.
Бахтиёр Маматкаримов. Фото: ЎзА
Шунингдек, Жуманиязов Умрбек Маткаримович Гурлан тумани ҳокими лавозимига тасдиқланди. Тайинловга қадар у «Микрокредитбанк» АТБ бошқаруви раиси ўринбосари вазифасида ишлаб келган.
Умрбек Жуманиязов. Фото: ЎзА
Бундан ташқари Сурхондарё вилоят ҳокимининг қарори билан унга икки ўринбосар тайинланди.
Хусусан, Ўралов Сирожиддин Шодмон ўғли вилоят ҳокимининг ўринбосари — вилоят инвестициялар ва ташқи савдо бошқармаси бошлиғи котибияти мудири этиб тайинланди.
У 1996 йилда Қумкўрғон туманида туғилган. 2018 йилда Термиз давлат университетининг тарих факультетини тамомлаган. Ҳозирда ушбу университетнинг иқтисодиёт йўналиши сиртқи таълим шаклида 4- босқичда ўқийди. Шу кунгача ушбу котибиятда бош мутахассис вазифасида ишлаб келган.
Сирожиддин Ўралов. Фото: Сурхондарё вилояти ҳокимлиги
Халилов Акрамжон Рустамович эса вилоят ҳокимининг туризм, маданият, маданий мерос ва оммавий коммуникациялар масалалари бўйича ўринбосари котибияти мудири бўлди.
Акрамжон Халилов. Фото: Сурхондарё вилояти ҳокимлиги.
Акрамжон Халилов 1993 йилда Қизириқ туманида туғилган. 2017 йилда Термиз давлат университетининг информатика ўқитиш методикаси факультетини тамомлаган. Ҳозирда ушбу университетнинг молия йўналиши сиртқи таълим шаклида 4-босқичда таҳсил олмоқда. У шу кунгача ушбу котибиятда бош мутахассис вазифасида ишлаб келаётганди.
