резидент Шавкат Мирзиёев Туркиянинг Бартин вилоятидаги кўмир конида юз берган портлаш оқибатида кўплаб инсонлар қурбон бўлгани муносабати билан мамлакат президенти Режеп Таййип Эрдоғанга таъзия йўллади.
Давлат раҳбари вафот этганларнинг оила аъзолари ва яқинларига ҳамдардлик билдириб, жароҳат олган кончилар тез фурсатда соғайиб кетишини тилади, дея хабар қилди унинг матбуот котиби Шерзод Асадов.
Жума куни кечқурун Туркиянинг Қора денгиз соҳилидаги Бартин вилояти Амасра туманидаги Turkish Hard Coal Enterprises шахтасида портлаш содир бўлди. Воқеа содир бўлган пайтда конда 110 га яқин одам бўлган. Улардан 58 нафари тирик қолган, деди Туркия ички ишлар вазири Сулаймон Сойлу шанба куни эрталаб. Анадолу агентлигининг хабар беришича, сўнгги маълумотларга кўра, қурбонлар сони 41 кишига етган.
«Биз 11 қурбонга ёрдам бериш учун қўлимиздан келганини қиламиз. Улардан олти нафари Истанбулда, беш нафари Бартинда даволанмоқда», — деб ёзди Туркия соғлиқни сақлаш вазири Фаҳреттин Кожа ижтимоий тармоқда.
Фото: Анадолу.
BBC хабарига кўра, ички ишлар вазири портлаш тахминан 300 метр чуқурликда содир бўлганини маълум қилган. Ушбу кўрсаткичдан пастроқда 49 киши ишлар оларди. Портлаш сабаблари ҳозирча аниқланмаган, маҳаллий прокуратура тергов бошлаган. Туркия энергетика вазири Фотиҳ Дўнмезнинг сўзларига кўра, бу тўпланган метан-ҳаво аралашмасининг портлаши бўлиши мумкинлигини бир қанча омиллар кўрсатмоқда.
Туркия президенти Режеп Таййип Эрдоған шанба куни режалаштирилган тадбирларни бекор қилиб, фожиа содир бўлган жойга учиб кетди. У Туркия конларида аварияларнинг олдини олиш бўйича чора-тадбирлар тайёрланишини маълум қилди
