Ижтимоий тармоқларда Тошкент вилояти Қибрай туманида қурилиши режалаштирилган коттежларга олдиндан пул тўлаган 108 та хонадон эгалари тўпланиб президентга мурожаат қилди.

Маълум бўлишича, ушбу коттежлар Limonaria қурилиш компаниясининг Baraka Hi-tech House лойиҳаси ҳисобланади. Қурилиш ишлари 2022 йилнинг ноябрь декабрь ойларида тугалланиб, уйлар ўз эгаларига топширилиша керак бўлган. Аммо белгиланган ҳудуд ҳозирда қаровсиз ҳолатда турганлиги маълум бўлди.

Мурожаат қилувчи фуқаролардан бири курилиш учун ҳар бир лойиҳага 2,5 сотих ер берилгани, бунда фуқаролар 500 млн сўмдан 1 млрд 200 млн сўмгача тўловни амалга оширгани, аммо қурилиш ишлари ҳалигача бошланмаганини қайд этди.

«Компаниядан изоҳ сўрадик. Унинг норасмий директори Исмаилов Баҳодир ва юридик бошлиғи Каримова Феруза коттежлар қуриладиган майдон катта қарздорликни тўлаб МИБ органилари иштирокида аукциондан сотиб олинганлиги ва фойдаланиш учун Давлат архитекткра идорасидан электрон кадастр ҳужжатини тақдим этишди», — дейди фуқаролардан бири.

Шунингдек, тўпланганларнинг аксарияти ўз турар жойини сотиб ижарада яшаётгани, прокуратура, Сенат ва Вазирлар Маҳкамасига мурожаат қилингандан сўнггина норасмий бошқарувчи камоққа олигани ҳам айтиб ўтилди.

«Газета.uz» Limonaria компаниясининг ижтимоий тармоқдаги саҳифаси йўқолиб қолганига эътибор қаратди.

Бошқа бир фуқаро вазирликка мурожаатдан сўнг пуллар қисман қайтарилишидан норози бўлди.

«Бизга пулларни қисман қайтариб оласизлар деб айтяпти. Нима учун қисман? Уйимизни сотиб, ойликка ишлаб нечи йилдир йиғган пулини кимларгадир […] президентимиз ваколат берганларку ҳокимиятдагиларга, халққа ёрдами тегсин деб имконият беряпти. Улар эса бизни суиистеъмол қилмоқда», — деди у.

Йиғилганлар номидан сўзга чиққанлар «алданиб» қолишда фақатгина қурилиш компанияси бошлиғининг эмас, балки уларга шундай ҳужжатларни тақдим этган давлат органларининг ҳам ҳиссаси борлигини таъкидлади.

Яна бир фуқаро жами тўпланган пуллар 6 млн доллар эканлиги ва уларни ўз эгаларига қайтариш кераклиги бўйича мурожаат қилди.

«Бошқа жойларда ҳам қурилаётган лойиҳалари бор. У ерда яхши аудиторни олиб бориб текшириш керак ва моддий ва манавий зарарни қоплаши керак. Президентимиздан бу бўйича амалий ёрдам кўрсатишни сўраймиз» — дейилади видеода.