Ўзбекистон президенти Шавкат Мирзиёев 6 октябрь куни Сирдарё вилоятининг Сайхунобод туманида бўлиб ўтган йиғилишда Конституцияга ўзгартиришлар киритишда шошилишнинг ҳожати йўқлигини яна бир бор таъкидлади.

У 1 августгача Конституцияни ўзгартиришга 150 мингдан ортиқ таклифлар тушганини эслатиб, «Бу халқимизнинг эртанги кунга бефарқ эмаслигидан далолат беради», — деди.

«Ўқитувчилар, олимлар, тадбиркорлар, фахрийлар, ветеранлар, нуронийлар ва бошқалар — жамиятда қандай раҳбарият бўлишидан қатъи назар, ҳар бири қонун, Конституция мени ҳимоя қилсин деяпти. Шунинг учун, [конституциявий] комиссия 1 августдан кейин [ўзгартиришлар лойиҳаси] муҳокамаси тугаллангандан сўнг ҳам ўз фаолиятини давом эттирмоқда. Шундан сўнг 2500 га яқин таклиф ҳам келиб тушди», — деди президент.

«Мукаммал ва халқчил» Конституция яратиш учун «шошилишнинг ҳожати йўқ», — деди давлат раҳбари. Аввалроқ у янгиланган ҳужжатни «шошилмасдан, чуқур ўйлаб, халқ билан маслаҳатлашиб» қабул қилиш кераклигини бир неча бор таъкидлаган эди.

«Менинг таклифим шошилмаслик керак. 150 000 нафар аҳоли… Қачон улар келажакда ташаббуслар бўйича ўз таклифларини беради? Масалан, одамларимиз очиқ бюджет бўйича овоз беришни ўргандими? Адолат бўлса, жамият ўзгаради. Ҳеч ким [бу жараёнга] аралашмаяпти. Энди тасаввур қилинг-а, агар барча ажратилган маблағлар очиқ бюджетга ажратилса ва одамлар овоз бериб, унга қўл қўйса, менга қанча яхши бўларди. 10 карра кўп адолат бўларди, 15 карра пул қисқарарди», — деди президент.

Шавкат Мирзиёев, агар керак бўлса, «халқ Конституцияни ўзиникидек қабул қилиши» учун «аҳоли билан келишиб» тузатишлар киритилишини яна бир бор таъкидлади.

«Биз одамларга 150 000 га яқин таклифлари учун уларга жавоб беришимиз керак: бу тўғри ёки нотўғри, биз буни қабул қиламиз ва буни қабул қилмаймиз, нега қабул қиляпмиз ёки нега қабул қилмаяпмиз. Шундай замон ҳам келяптики, одамлар: „Мен ҳам эшитди“, деган фикрда бўлади. Ўйлайманки, шошмаслик тўғри бўлади», — дея таъкидлади у.

1 август куни Конституцияга ўзгартиришлар киритиш бўйича халқ муҳокамаси якунланди. Аввалига муҳокама қилиш учун 10 кун ажратилди. Кейин депутатлар бу вақт етарли эмаслигини тан олишди ва яна 10 кун қўшишди. Кейинроқ муҳокамани яна 15 кунга узайтиришга қарор қилинди.

Умумхалқ муҳокамаси якунланганидан сўнг конституциявий комиссия Қонунчилик палатасининг масъул қўмиталари «одамлардан келиб тушган таклифларни умумлаштириш ва таҳлил қилиш, шунингдек, қонун лойиҳасини якунлаш бўйича ишларни давом эттириши»ни маълум қилди. Комиссия вақти-вақти билан алоҳида мақолаларида режалаштирилган ўзгаришлар ҳақида ҳисобот беряпти, аммо бу жараённи бутунлай очиқ деб атаб бўлмайди.

Президент ўтган йилнинг ноябрь ойида бўлиб ўтган тантанали маросимдаги нутқида илк бор Конституцияни ислоҳ қилиш зарурлиги ҳақида гапириб, бундай таклиф мамлакат аҳолисининг ўзидан келаётганини таъкидлаганди. Шавкат Мирзиёев декабрь ойида Ўзбекистон халқини Конституциянинг 29 йиллиги муносабати билан табриклар экан, 2022 йил 8 декабрга қадар Конституциянинг 30 йиллигига бағишланган ўзгартиришлар киритишни таклиф қилди.