Пайшанба куни Таиланднинг Нонг Буа Лампху провинциясида собиқ полициячининг болалар марказига уюштирган ҳужуми оқибатида 38 киши, жумладан 22 бола ҳалок бўлди, деб хабар берди BBC.

Ҳуқуқ-тартибот идораларига кўра, ҳужумчи 34 ёшли Панья Камраб бўлиб, ўтган йили у гиёҳванд моддалар истеъмол қилгани учун полициядан ҳайдалган.

Таиланд матбуотига кўра, Камраб ов милтиғи, тўппонча ва пичоқ билан қуролланган. Шунингдек, у ўз машинасини ўткинчилар гуруҳига устига бостириб юборгани ҳам маълум қилинган.

Таиланд Марказий Тергов Бюросининг (CIB) хабар беришича, ҳужумдан кейин эркак ўз жонига қасд қилган, шунингдек, хотини ва боласини отиб ўлдирган.

Полиция вакилининг журналистларга айтишича, Камраб бир кун аввал наркотик иши бўйича суд мажлисида қатнашган.