Наманган вилояти Чортоқ туман тиббиёт бирлашмаси раҳбари вазифасини бажарувчи Тоҳир Мўминов туғруқхонанинг тўлиб-тошган бўлимлар акс этган видеолавҳаси интернетда тарқалгач, ўз лавозимидан озод этилди, дея маълум қилди Соғлиқни сақлаш вазирлиги матбуот хизмати.
Аниқлик киритилишича, тиббиёт муассасасининг 50 ўринга мўлжалланган туғруқ бўлимига йилнинг тўққиз ойида 3700 дан ортиқ ҳомиладор аёл қабул қилинган. Бунга қадар муассаса кунига ўртача 13 та туғруқни амалга оширган, яъни қўшимча иш юки сезилмаган. Сентябрь ойида эса туғилишлар сони кунига ўртача 20 тагача кўтарилди, бу эса жойларнинг етишмаслигига олиб келди.
«Туман тиббиёт бирлашмаси раҳбарияти мазкур масалани ҳал этиш бўйича ўз вақтида керакли чора-тадбирлар кўрмаган. Оқибатда ушбу туғруқ бўлимидаги палаталарда ўрин-жойлар санитар-эпидемиологик талабларга риоя этилмаган ҳолда жойлаштирилган. Яъни самарасиз ишлаётган стационар ўринлар ҳисобига ҳомиладор аёллар учун қўшимча ўрин-жойлар яратиш имконияти мавжуд бўла туриб, туман тиббиёт бирлашмаси раҳбарияти мазкур муаммога совуққонлик билан ёндашган», — дейилади хабарда.
Муаммоли вазиятни тезкорлик билан ҳал этиш учун туғруқ бўлимига қўшимча 20 та ўрин (жами 70 ўрин) ажратилди.
Аввалроқ, туғруқ бўлими мудираси Ҳамида Обидова Daryo`га берган интервьюсида санитария қоидаларига кўра, битта бўлимга уч нафардан ортиқ бемор киритилмаслигини айтганди. Бироқ, туғруқ давридаги аёллар сонининг кўпайиши ва ётоқхоналар етишмаслиги сабабли тиббиёт муассасаси ходимлари ҳаттоки кабинетларини бўшатишга мажбур бўлишган. Ижтимоий тармоқларда эълон қилинган видеода бир палатада янги туғилган чақалоқлари билан ётган 10 дан ортиқ аёл тасвирланган.
Хамида Обидова. Фото: Daryo.
Ҳамида Обидова, шунингдек, аввалроқ Чортоқ вилоятида 25 минг нафар туғиш ёшидаги аёллар бўлгани, туғруқ мажмуаси юкламани енгиб келганини таъкидлади. Ҳозир бу кўрсаткич 30 мингга ошиб, 55 минг нафар аёлга етди.
«Илгари туғруқхонада 160 ўрин ажратилган бўлса, кейинчалик баъзи фармойишларга кўра бу кўрсаткич меъёр ва қоидаларга мувофиқ бўлиши учун 50 ўринга қисқартирилди», — деди бошқарма бошлиғи.
