Эронда Маҳса Аминийнинг ҳижоб туфайли полиция томонидан ҳибсга олинганидан кейин ўлими сабаб бўлган тартибсизликларда ҳалок бўлганлар сони 40 дан ошди, бироқ ҳуқуқ ҳимоячиларининг фикрича, ҳақиқий рақам бундан ҳам кўпроқ бўлиши мумкин. Бу ҳақда Euronews хабар берди.

Ослода жойлашган эронликларнинг ноҳукумат ташкилоти қурбонлар сони 76 нафарга етганини маълум қилмоқда. IHR инсон ҳуқуқлари гуруҳи эса энг камида 57 намойишчи ҳалок бўлганини билдирди.

Amnesty International инсон ҳуқуқлари ташкилоти 23 сентябрь куни камида 4 боланинг ўлими ва «намойишчиларга атайлаб ва ноқонуний ўқ отиш» амалиёти ҳақида хабар берди.

Намойишлар чоғида эронликлар шиорлар кўтариб қаттиқ қонунларга қарши эканликларини билдиришмоқда. 1200 дан ортиқ намойишчи ҳибсга олинди, бироқ Эроннинг йирик шаҳарларида одамлар оммавий кўчаларга чиқишда давом этмоқда, деб ёзади Euronews.

Намойишчиларга миллий хавфсизлик кучлари қаршилик кўрсатмоқда. Инсон ҳуқуқлари гуруҳларига кўра, хавфсизлик кучлари сув пуркагичлардан фойдаланган, шунингдек, ўқ узган, намойишчилар эса тош отган, полиция машиналарига ва жамоат биноларига ўт қўйган.

Истанбул, Париж, Лондон, Сан-Франсиско ва дунёнинг бошқа шаҳарларида ҳам намойишчилар шиорлар билан юришмоқда, дея қайд этади телеканал. Намойишчилар «Аёл, ҳаёт, озодлик!» деб ҳайқирмоқда, аёллар эса исёнкорлик билан ҳижобларини ёқишмоқда.

Қаттиқ интернет чекловлари, жумладан Instagram ва WhatsApp блокланганига қарамай, ижтимоий тармоқларда тарқалаётган янги видеоларда Теҳрон, Язд, Исфахон ва Бушеҳрда норозилик намойишлари акс этган.