Фарғона вилояти Учкўприк туманида собиқ ҳамшира уй шароитида нотўғри укол қилиши оқибатида қизалоқ вафот этди. Бу ҳақда Sevimli телеканалининг Zamon дастурида хабар берилди.

Маълум қилинишича, 1988−2000 йилларда туман тиббиёт бирлашмасида ишлаган, соғлиги ёмонлашгани боис ишламай қўйган ҳамшира қишлоқдошларининг илтимосига кўра уй шароитида шифокор буюрган уколларни қилиб келган. Овсинининнг келини ҳам унга қизи бетоблигини, шифокорга учаргани ва дорилар ёзиб берганини, қизига укол қилиш кераклигини айтиб, илтимос билан чиққан.

Қариндошига йўқ дея олмаган ҳамшира шифокор тавсия қилган «Сефтокс» номли кукунни 10 грамм «Новокаин» билан эритган ва эритманинг 0,1 грамини беморнинг чап қуймуч қисмига синама тарзда юборган. Орадан 3−4 дақиқа ўтгач, қиз қорни оғриётганини айтиб, қайт қилиб юборган ва бир оздан сўнг ҳушини йўқотган. Қизни Бувайда туман тез тиббий ёрдам бўлими 9-сонли шохобчасига олиб борилаётган вақтда вафот этган.

Суд тиббий экспертизасининг хулосасига кўра қизалоққа «Сефтокс-Навакаэн» эритмаси юборилганда ножўя таъсир оқибатида аллергик реакцияни юзага келтирган ва нафас йўллари беркилиб қолган. Уй шароитида мазкур ҳолатнинг олдини олишда фойдаланиладиган дори воситалари бўлмагани учун ўлим ҳолати қайд этилган.

Ҳолат юзасидан юритилган иш Жиноят ишлари бўйича Қўқон шаҳар судида кўриб чиқилиб, судланувчига нисбатан Жиноят кодексининг 102-моддаси (эҳтиётсизлик орқасида одам ўлдириш) 1-қисми билан жазо тайинланган.

«Унинг аёл киши эканлигини, муқаддам судланмагани, жабрланувчининг қонуний вакилини унга нисбатан даъвоси йўқлигини енгиллаштирувчи ҳолат сифатида инобатга олиб, модда санкциясида назарда тутилган 2 йил муддатга озодликни чеклаш жазоси тайинланди», — деди Жиноят ишлари бўйча Қўқон шаҳар суди судяси Машрабжон Улуғбеков.