9 сентябрь куни Тошкент шаҳрида Mubadala ва TAQA (БАА) компанияларининг «Талимаржон ИЭС»га кенг кўламли инвестицияларини киритишларини назарда тутувчи битимларни имзолаш маросими бўлиб ўтди. Бу хақда вазирлик матбуот хизмати хабар қилди.
Маросимда БАА томонидан энергетика ва инфратузилма вазири Сухейл ал-Мазруи ҳамда Mubadala ва TAQA компаниялари раҳбарлари иштирок этди. Ўзбекистон томонидан бош вазир ўринбосари — инвестициялар ва ташқи савдо вазири Жамшид Ходжаев, Энергетика вазирлиги, «Миллий электр тармоқлари» ва «Иссиқлик электр станциялари» акциядорлик жамиятлари раҳбарлари иштирок этди.
Имзоланган битимлар «Талимаржон» иссиқлик электр станциясини бошқарадиган қўшма корхона ташкил этишни назарда тутади. БАА компанияларининг инвестициялари қўшма корхонанинг 300 миллион долларлик устав капиталидаги 80 фоиз улуши учун тўлов ҳамда илгари «Талимаржон ИЭС» АЖ томонидан жалб қилинган таҳминан 700 миллион долларлик кредитларни тўлашга йўналтирилган маблағлардан иборат. Умумий инвестиция миқдори 1 млрд долларни ташкил этмоқда.
Имзоланган битимлар БАА компаниялари учун «Талимаржон ИЭС» ва бошқа иссиқлик электр станцияларини электр энергиясини ишлаб чиқаришнинг бирлаштирилган циклининг энг замонавий буғ — газ қурилмалари билан жиҳозлаш орқали уларнинг ишлаб чиқариш қувватларини кенгайтиришга қўшимча инвестициялар киритиш имкониятини беради, дейилади хабарда.
«Стратегик энергетика саноатида чет эл инвестицияларининг фаол иштироки йирик инфратузилма активларини ташқи қарз олиш йўли билан молиялаштиришнинг анъанавий ёндашувини тўғридан-тўғри хорижий инвестицияларни жалб қилишга ўзгартиришга имкон беради ва шу билан республика ташқи қарзи билан боғлиқ ҳолатнинг барқарорлигини ва суверен кредит рейтингининг изчил яхшиланишини таъминлайди», — дея қайд этилади вазирлик хабарида.
Эслатиб ўтамиз, ИЭСнинг БАА компаниялари томонидан модернизация қилиниши ва инвестиция киритилиши юзасидан 2019 йилдан буён музокаралар ўтказилиб келинмоқда.
