Қозоғистоннинг Костанай вилояти Аулиекол туманида 2 сентябрь куни ўрмон ёнғинлари бошланди, ҳудуддаги ёнғин учинчи кундирки ўчирилмоқда. 5 сентябрь ҳолатига кўра, ёнғинлар майдони 43 минг гектаргача кенгайган, ўрмон хўжалигининг умумий майдони эса 107,3 минг гектарни ташкил этди, деб хабар қилди мамлакат Фавқулодда вазиятлар вазирлиги.
Вилоятда бир кун аввал маҳаллий фавқулодда ҳолат эълон қилинган, деб хабар берди вилоят ҳокимлиги. 1800 дан ортиқ одам эвакуация қилинган.
Ёнғинни ўчиришга Фавқулодда вазиятлар, Ички ишлар, Мудофаа вазирликлари ва ўрмон хўжалигининг 196 та техникаси, 7 та самолёти, 5 та ўт ўчириш поезди ҳамда 1526 нафар шахсий таркиби жалб этилган. Ёнғинни ўчириш бошлангандан бери вертолёт билан 93 марта сув тўкилди.
Шанба куни ёнғин Озерное, Лесное, Аманқарағай қишлоқларидаги турар-жой биноларига ва Аманқарағай нефть базаси ҳудудига ўтгани қайд этилган. Оқибатда 108 та бино ёнғин натижасида вайрон бўлган ва зарар кўрган.
10 киши — беш нафар маҳаллий фуқаро, шу жумладан бир бола, шунингдек, бир ўрмон хўжалиги ходими, ҳокимлик ходими ва уч нафар қутқарувчида жароҳатланиш, куйиш, енгил ва ўртача оғирликдаги заҳарланиш ҳолатлари қайд этилди, дея хабар беради Фавқулодда вазиятлар вазирлиги.
4 сентябрь куни Аманқарағай қишлоғида вайроналарни таҳлил қилиш чоғида 86 ёшли пенсионернинг жасади топилган. Фавқулодда вазиятлар вазири Юрий Илйиннинг сўзларига кўра, участка инспектори маҳаллий аҳолини эвакуация қилиш ҳақида хабардор қилган, бироқ у кетишдан бош тортган. Шунга қарамай, Бош прокуратура ёнғинларда одамларнинг ўлими факти бўйича жиноий иш қўзғатди.
Қозоғистон президенти Қасим-Жомарт Токаев 5 сентябрь куни эрталаб Костанайга етиб борди ва ўрмон ёнғинларидан жабр кўрган ҳудудлар устидан вертолёт парвозини амалга оширди. Унинг тезкор штабга ташриф буюриб, ёнғинларни бартараф этиш чора-тадбирлари билан танишиши кутилмоқда.
