Ички ишлар вазирлиги томонидан «махсус тезкор ва профилактик тадбирларда» аниқланган ОИВ/ОИТС инфекцияси билан касалланганликда гумон қилинаётган шахсларни давлат бюджети маблағлари ҳисобидан мажбурий равишда тиббий текширувдан ўтказиш тўғрисидаги Вазирлар Маҳкамаси қарори лойиҳаси муҳокамага қўйилди.
ИИВ президентнинг 2022 йил 25 июлдаги (очиқ манбалар асосида топишнинг имкони бўлмади) қарорига асосан тегишли механизмларни ишлаб чиқиш бўйича вазифалар белгиланганини маълум қилмоқда.
Лойиҳада 2023 йил 1 январдан бошлаб мажбурий тиббий кўрикдан ўтиш тартибини тасдиқлаш таклиф этилмоқда.
Ҳужжатда «хавфли гуруҳ»нинг таърифи келтирилган бўлиб, улар ўзининг ғайриижтимоий хулқ-атвори туфайли ўзга шахсларга жинсий алоқа йўли орқали юқувчи касалликларни (ОИВ, захм, сўзак ва бошқалар) юқтириш хавфи юқори бўлган рағбатлантириш эвазига интим хизмат кўрсатувчилар, бесоқолбозлар ва таносил касаллигига чалинган, шунингдек, гиёҳвандлик воситаларини игна орқали қабул қилувчи ёки қабул килганликда гумонланган шахслардир.
Хавфли гуруҳ билан алоқада бўлган шахслар:
- махсус тезкор ва профилактик тадбирларда аниқланган, хавфли гуруҳга кирувчи шахслар билан жинсий алоқага киришган ёки жинсий алоқага кирганликда гумонланган шахслар;
- махсус-профилактик тадбирлар давомида аҳлоққа зид бўлган ҳуқуқбузарликлар (рағбатлантириш эвазига интим хизмат кўрсатувчилар, жинсий эркинликка ва аҳлоққа қарши, таносил ёки ОИВ/ОИТС инфекциясини тарқатиш билан боғлиқ жиноятлар)ни содир этилиши мумкин бўлган объектларда ишловчилар ва ташриф буюрувчи шахслар;
- касб юзасидан ўз вазифаларини бажармаганлиги ёки лозим даражада бажармаганлиги оқибатида бошқа шахсга ОИВ/ОИТС инфекциясини юқтириш билан боғлик бўладиган объектларда ишловчилар ҳамда тадбир давомида бундай объектларда аниқланган шахс (мижоз)лар.
«Хавфли гуруҳ»га кирувчи ва улар билан алоқада бўлган шахсларни тиббий текширувдан Ўзбекистон ОИТСга қарши курашиш маркази, Қорақалпоғистон, вилоятлар ва Тошкент шаҳридаги ОИТСга қарши курашиш марказлари, шунингдек, ОИВ инфекциясига ташхис қўйиш бўйича туманлараро лабораторияларда ўтказиш режалаштирилган.
Лойиҳага кўра, ОИВ/ОИТС бўйича мажбурий тиббий текширувдан ўтказиш ушбу инфекциясини барвақт аниқлаш ҳамда бошқа шахсларга юқишини олдини олиш, аҳоли ўртасида ОИВ инфекцияси тарқалишини камайтириш мақсадида амалга оширилади.
Ички ишлар органлари томонидан махсус тезкор ва профилактик тадбирларда аниқланган ОИВ/ОИТС инфекцияси билан касалланганликда гумон қилинаётган шахсни мажбурий равишда тиббий текширувдан ўтказиш ички ишлар органларининг терговга қадар текширувни амалга оширувчи масъул ходим қарорига асосан ўтказилади.
Вояга етмаган, муомалага лаёқатсиз ёки муомала лаёқати чекланган деб топилган шахсларни ОИВ/ОИТС инфекциясига ғайриихтиёрий равишда тиббий текширувдан ўтказиш уларнинг яқин қариндошлари ёки қонуний вакиллари иштирокида амалга оширилиши кутилмоқда.
Ҳуқуқбузарликлар профилактикасини бевосита амалга оширувчи органлар ва муассасалар ўз ваколатлари доирасида хавфли гуруҳга кирувчи ва улар билан алоқада бўлган шахс ўртасида ҳуқуқбузарликларнинг умумий, махсус, якка тартибдаги ва виктимологик профилактикасини самарали ташкил этишга масъул ҳисобланади.
Қарор лойиҳасининг муҳокамаси 10 сентябрга қадар давом этади.
