«Ўзбекистонда хизмат кўрсатган тадбиркор» фахрий унвони таъсис этилади. Бу ҳақда Ўзбекистон президенти 22 август куни ўтказилган ишбилармонлар билан навбатдаги учрашувида маълум қилди.
«Бизда қурувчи, маданият, таълим каби соҳа вакиллари учун фахрий унвонлар мавжуд. Лекин, Янги Ўзбекистон пойдеворини яратишга энг катта ҳисса қўшиб келаётган заҳматкаш тадбиркорларнинг эътибордан четда қолгани адолатдан эмас», — деди у.
«Шу боис, кўп иш ўринлари яратган, бизнеснинг янги йўналишларини йўлга қўйган, ўз соҳасида инновация ва ислоҳотлар қилган ва эл-юрт орасида обрў топган бизнес вакилларини муносиб эътироф этиш учун „Ўзбекистонда хизмат кўрсатган тадбиркор“ фахрий унвонини таъсис этишни таклиф қиламан», — деди Шавкат Мирзиёев.
Эслатиб ўтамиз, мазкур учрашув олдидан президент қарори билан «Фаол тадбиркор» кўкрак нишони таъсис этилиб, 100 нафар ишбилармон мазкур мукофот билан тақдирланганди.
