«Чиноз нефтни қайта ишлаш заводи» устав капиталидаги 100 фоиз давлат улуши сотувга қўйилади. Жараён юзасидан профессионал консалтинг компанияларини танлаб олиниши бўйича танлов эълон қилинди. Бу ҳақда Давлат активларини бошқариш агентлиги матбуот хизмати маълум қилди.
Барча қизиқиш билдирган талабгорлардан таклиф тақдим этиш учун сўровномага (RfP) асосан тижорат таклифларини жорий йил 27 август куни соат 18:00 га қадар тақдим этишлари мумкин.
Агар, биргаликда қўшма тижорат таклифи тақдим этилса, жалб қилинган шерик-консультантнинг ҳам ишини мувофиқлаштириш учун масъул бўлган ва жавобгарликни зиммасига оладиган асосий консультант кўрсатилиши лозим.
Нефт саноати соҳасида тегишли билим ва тажрибага эга бўлган маслаҳатчига устунлик берилади.
Маълумот учун, «Чиноз нефтни қайта ишлаш заводи» МЧЖ — асосий вазифаси нефтни қайта ишлаб бензин, керосин, мазут, дизел ёқилғиси ва мойларга айлантиришни ташкил этишдан иборат. Ушбу саноат корхонаси йилига 117,0 минг тоннадан зиёд углеводород хомашёсини қайта ишлаш имконини берувчи замонавий технологик ускуналар билан жиҳозланган.
Корхона 2016 йил 11 август куни фаолиятини бошлаган. Устав фонди — 102,0 млрд. сўмни ташкил этади.
Эслатиб ўтамиз, бундан олдин «Dori-Darmon» корхонаси хусусийлаштирилиши ҳақида хабар берилган эди.
