Россиялик божхоначилар Ўзбекистондан Новороссийск портига келган контейнерда бир тоннадан ортиқ исириқ (гармала) борлигини аниқлади. Бу ердан у қуруқ йўл билан Яқин Шарқ давлатларидан бирига юборилиши керак эди, деб хабар берди «Кубань 24» телеканали.
Контейнерда исириқдан ташқари, қуритилган мевалар, наматак, идиш-товоқ ва зиғир ёғи ҳам бўлган.
«Божхона кўригидан ўтказиш чоғида кейинги ўрганишлар учун қуритилган ўсимликдан намуналар олдик. Экспертиза шуни кўрсатдики, „ҳармала“ кўп йиллик ўсимлиги таркибида Россия Федерациясида назорат қилинадиган гиёҳвандлик воситалари, психотроп моддалар ва уларнинг прекурсорлари рўйхатига киритилган „ҳармин“ гиёҳвандлик моддаси бор», — деди Новороссийск божхона пости бошлиғи в.б. Вадим Пронин.
Контрабанда факти бўйича жиноий иш қўзғатилган. Юборувчи умрбод қамоқ жазоси ва миллион рублгача жаримага тортилиши мумкин.
