21 июль куни Тошкентда фуқаро 4 яқинини пичоқлагани гумон қилинмоқда. «Марказий студия» кўрсатувида эфирга узатилган лавҳада айтилишича, қотиллик Чилонзор тумани 7-даҳасида жойлашган 21-уйда содир бўлган.
Туман прокуратураси ва ИИБ воқеа жойига етиб бориб ҳолатни ўрганган.
Чилонзор тумани Прокуратураси катта терговчиси Отабек Бекиевнинг маълум қилишича, 1989 йилда туғилган шахс турмуш ўртоғи билан келиб чиққан зиддиятда хотини, 7 ёшли фарзанди, қайнонаси ва қайнопасига ўткир тиғли ошхона пичоғи билан бир неча марта тан жароҳати етказган.
Жароҳатланганлар ўша куни 21:30 лар атрофида Республика шошилинч тез тиббий илмий марказига олиб келинган ва операция бўлимига ётқизилган. Шифокорнинг сўзларига кўра, 4 нафар бемор ҳам оғир аҳволда бўлган. Бир вақтнинг ўзида 4 та бригада операцияни амалга оширган.
Ўша вақтда аниқланишича, бир беморнинг кўкрак қафаси шикастланиши натижасида ўпкаси йиртилган. Иккинчи беморнинг эса ичаклари кесилгани маълум бўлди. Ҳозирги вақтда беморларнинг аҳволи барқарор, стабиллашган. Ижобий тарафга ўзгариш бор, дея таъкидлади у.
4 кишига шикаст етказган шахсга Жиноят кодексининг 97-моддаси 2-қисми «а» банди (икки ёки ундан ортиқ шахсни қасддан ўлдириш) билан жиноят иши қўзғатилди ва қамоққа олиш эҳтиёт чораси қўлланилди. Агарда унинг жинояти ўз тасдиғини топса, фуқаро ўн беш йилдан йигирма беш йилгача озодликдан маҳрум қилиш ёки умрбод озодликдан маҳрум қилиш жазосига тортилиши мумкин.
