Сешанба куни АҚШ Савдо вазирлиги тўққиз мамлакатнинг 36 та компаниясини АҚШнинг халқаро санкциялар қонунларини бузгани учун АҚШ технологиялари ва товарларига бўлган рухсат чекланган ташкилотлар рўйхатига киритди.
Чекловчи рўйхатдан Хитойда жойлашган 25 та, шунингдек Россия, БАА, Литва, Покистон, Сингапур, Буюк Британия, Вьетнам ва Ўзбекистондаги компаниялар ўрин олган.
Чекловларга, хусусан, Ўзбекистондаги Promcomplektlogistic хусусий корхонаси ҳам киритилди. Ушбу компания ва Хитой, Литва, Ветнам ва Буюк Британия билан боғлиқ бўлган бошқа бир қатор корхоналар рус қўшинларининг Украинага бостириб киришидан кейин кучга кирган санкциялар режимини бузгани учун «Россия ҳарбий-саноат комплексини қўллаб-қувватлаш»да гумон қилинмоқда.
3 март куни АҚШ Давлат департаменти Россия мудофаа саноати учун хорижий маҳсулотлар ва электрон бутловчи қисмларни харид қилишга ихтисослашган «Радиоавтоматика» корхонасини санкциялар рўйхатига киритганди.
Давлат департаменти Promcomplektlogistic`ни «Радиоавтоматика» «3 март куни рўйхатга киритилганидан кейин АҚШ санкцияларидан қочишга қаратилган саъй-ҳаракатларида фаол қўллаб-қувватлагани» учун рўйхатга киритган. Хусусан, компания россиялик ҳамкорига микросхема каби электрон компонентлар етказиб бергани хабар қилинмоқда.
Агентлик маълумотларига кўра, Ўзбекистон компанияси мол-мулки ва мулкий манфаатлари санкцияларга мувофиқ блокировка қилинган юридик шахс ҳисобланадиган «Радиоавтоматик»га моддий, ҳомийлик, молиявий, технологик ёрдам, товарлар ёки хизматлар кўрсатгани учун рўйхатга тушган.
«Promcomplektlogistic хусусий компаниясига ушбу мақом берилиши бутун дунё бўйлаб манфаатдор тижорат томонларга огоҳлантириш бўлиб хизмат қилиши керак: агар сиз санкциялар остидаги юридик ёки жисмоний шахслар билан бизнес юритадиган бўлсангиз, санкцияга тушиб қолишингиз мумкин», — дейилади АҚШ Давлат департаменти баёнотида.
Бундан ташқари, компания бир вақтнинг ўзида Савдо вазирлигининг юридик шахслар рўйхатига киритилган. Қора рўйхатдагиларга товар ёки хизматлар етказиб беришни хоҳловчи Америка компаниялари Савдо вазирлигидан махсус лицензия олишлари шарт.
Корхоналар ва ташкилотларнинг Ягона давлат регистри маълумотларига кўра, Promcomplektlogistic 2018 йил июль ойида Тошкентда рўйхатдан ўтган ва устав капитали 10 млн сўм дея қайд этилган. Компаниянинг асосий фаолияти қуруқликдаги транспорт хизматларидир. Таъсисчиси ва раҳбари сифатида Олег Грабилин кўрсатилган.
