Ўзбекистон Олий Мажлиси Сенати раиси Танзила Нарбаева «Америка овози»га берган интервюсида Ўзбекистондаги мухолифат ҳақидаги саволга жавоб берди. Суҳбат юқори палата раисининг яқинда Вашингтонга ташрифи чоғида ёзиб олинган.
Америка медиа компанияси журналисти Навбаҳор Имомова халқаро ташкилотлар ўз ҳисоботларида Ўзбекистонда сиёсий рақобат, сиёсий майдон ва парламентда мухолифат йўқлигини қайд этаётганини таъкидлади. У Сенат раисидан нима учун Ўзбекистонда ҳалигача ҳақиқий мухолифат йўқ деган саволга қандай жавоб бериши мумкинлигини сўради.
«Мухолифат нимага йўқ? Бор-ку, ҳамма ёқда танқид бўляпти. Лекин, бу институционал равишда ташкил топиши учун вақт керак. Ҳозир фикр эркинлиги [бор]. Интернетда парламентга ҳам, раҳбариятга ҳам, ҳукуматга ҳам ва ҳоказоларга кескин фикрлар билдирилади. Мана шуни ўзи ҳам мухолифат эмасми? Халқнинг ўзи ҳам мухолифат бўлиши мумкин» — деди у.
Унинг сўзларига кўра, ҳар қандай ривожланган давлатда, ҳатто ҳамма тўқ ва энг ривожланган давлатларда ҳам халқ орасида норозилик бўлиб туради. «Бу нормал ҳолат деб ҳисоблайман», — деди Сенат раиси.
Танзила Нарбаеванинг таъкидлашича, ҳозирда юқори идоралар вакиллари фуқароларнинг мурожаатларини қабул қилиш ва уларга жавоб бериш учун «пастга» тушган.
«Ҳозир «тепа» «паст»га тушган. Мана ҳозир ОАВда кузатсангиз, ҳар бир вазир, Олий суд раиси, Бош прокурор бўладими, пастга тушган. Аҳолида «тепа», «паст» деган тушунчалар бўлмаслиги учун президент Мирзиёев барча амалдорларни «пастга» туширган. Фуқаролар қаерга мурожаат билан бормасин, уларнинг муаммоси тингланади», — деди у.
Президент Шавкат Мирзиёев 2019 йил декабр ойида сиёсий мухолифат ҳақида гапирар экан, унинг мамлакат ичида пайдо бўлиши, халқнинг барча муаммоларини билиши учун шароит яратиш зарурлигини таъкидлаганди.
2021 йил сентабр ойида президентлик сайлови арафасида Сенат раисининг биринчи ўринбосари Содиқ Сафаев мухолифатни жамият барқарор ривожланишининг асосий омилларидан бири деб атаган эди. «Бусиз, танқидсиз яъни, айтайлик, қандайдир бир альтернатив фикрларсиз, жамият ривожлана олмайди», — деганди у. Ўзбекистоннинг жамияти мухолифат бўлишидан манфаатдор. Сенатор мухолифат табиий тузилиши кераклигини айтиб, «ҳокимият берилмайди, ҳокимият учун курашиш керак» деган ақидани эслаганди.
