Бишкек суди Қирғизистоннинг собиқ президенти Алмазбек Атамбаев ва бошқа иштирокчиларни 2020 йил октябрь ойида оммавий тартибсизликларни уюштирганликка доир жиноят иши бўйича оқлади, деб ёзмоқда Kaktus.media. Айблов томони Атамбаевга 12 йил қамоқ жазосини сўраганди.
Айбланувчилар Алмазбек Атамбаевдан ташқари, президент девонининг собиқ раҳбари Фарид Ниёзов, собиқ бош вазир Омурбек Бабанов, ички ишлар вазирининг собиқ ўринбосари Курсан Асанов, Миллий хавфсизлик давлат қўмитасининг собиқ ходими ва сиёсатчилар Жениш Молдокматов ва Темирлан Султанбеков эди.
Собиқ президентга нисбатан қамоққа олиш тарзидаги эҳтиёт чораси уй қамоғига ўзгартирилди. Алмазбек Атамбаев суддаги сўнгги сўзини озодликка чиққач айтишига умид билдирди.
2020 йилнинг октябрь воқеалари Бишкекда парламент сайловларининг дастлабки натижалари оқибатида бошланганди. Ўшанда 16 партиядан фақат тўрттаси парламент — Жокоргу Кенешга ўтган, улардан иккитаси ҳукуматпараст деб аталган.
Минглаб одамлар намойишга чиқди, Оқ уй, Миллий хавфсизлик давлат қўмитаси бинолари тортиб олинди, Алмазбек Атамбаев тергов изоляторидан озод қилинди. 10 октябрь куни у яна қўлга олиниб, Миллий хавфсизлик давлат қўмитасининг тергов изоляторига жойлаштирилди.
Тергов маълумотларига кўра, Атамбаев ҳокимиятни қўлга киритиш учун собиқ президентликка номзод, собиқ бош вазир Омурбек Бабанов билан тил бириктирган. Айблов томони унинг ҳаракатлари ўқотар қуроллардан фойдаланган ҳолда оммавий тартибсизликларга сабаб бўлганини таъкидлади. Тартибсизликлар натижасида Қирғизистон президенти Сооронбай Жээнбеков ўз лавозимини тарк этди.
